Tramp Baydenin daha bir qərarını "məntiqsiz" elan etdi: Kağız əvəzinə plastik istifadə olunacaq

ABŞ Prezidenti Donald Tramp dövlət qurumlarının kağızdan olan su çöplərini almalarının dayandırılmasını, həmçinin bütün ölkədə plastik çöplərə qayıdılması üçün milli strategiyanın hazırlanmasını nəzərdə tutan sərəncam imzalayıb.

Oxu.Az-ın xəbərinə görə, bu barədə məlumat Ağ Evin saytında yerləşdirilib.

Qeyd edək ki, birdəfəlik plastikdən istifadənin azaldılması siyasəti Co Bayden Administrasiyası tərəfindən ölkədə ekoloji vəziyyətin yaxşılaşdırılması məqsədilə qəbul edilmişdi. Hökumət tədbirləri bütün büdcə təşkilatlarında plastik çöplərdən imtina edilməsini və müəssisələrin kağız alternativlərə keçməsinin stimullaşdırılmasını nəzərdə tuturdu.

Trampın yeni sərəncamında isə bu siyasət "irrasional" (məntiqsiz) olaraq tənqid edilir, kağız çöplərdən istifadə "qeyri-funksional" kimi qiymətləndirilir. Sənəddə xüsusi olaraq vurğulanır ki, fərdi araşdırmalara görə, kağız çöplərin istehsalı və istifadəsi kimyəvi maddələr, böyük həcmdə tullantılar və digər amillər səbəbindən ətraf mühitə daha çox zərər verə bilər. Milli strategiya isə biznesin kağız çöplərdən uzaqlaşdırılması üzrə tədbirləri işləyib hazırlamalıdır.

"Bu, gülünc vəziyyətdir. Biz plastik çöplərə qayıdırıq", - deyə Tramp sərəncamı imzalayarkən jurnalistlərə bildirib.

"Turtle Island Restoration Network" ekoloji qrupunun məlumatına görə, ABŞ-də hər gün təqribən 390 milyon su çöpündən istifadə olunur. Ölkənin bir sıra ştatları və şəhərləri öz normativ aktları əsasında ərazilərində plastik çöplərdən istifadəni qadağan ediblər.