Tramp: Bizə “murdar dəliklərdən” gələn miqrantlar lazım deyil

ABŞ prezidenti Donald Tramp konqresmenlərlə keçirdiyi görüşdə Birləşmiş Ştatların “murdar dəliklərdən” çıxan miqrantlara ehtiyacı olmadığını bildirib.

Oxu.Az xəbər verir ki, bu barədə “RİA Novosti” “Politico” nəşrinə istinadən məlumat yayıb.

Məlumata görə, bir qrup senator prezidentə Haiti, Salvador və Afrika ölkələrindən olan miqrantların aqibəti ilə bağlı güzəştli sazişlər haqqında təkliflər irəli sürmək üçün Ağ Evə gəlib və onunla görüşüb..

“Murdar dəliklərdən” gələn miqrantlar nəyimizə lazımdır?”, - deyə Tramp konqresmenlərin təklifinə reaksiya göstərib. ABŞ liderinin təbirincə, Birləşmiş Ştatlar Norveç kimi ölkələrdən miqrantlar qəbul etməlidir, nəinki adı sadalandığı ölkələrdən. Qeyd edək ki, çərşənbə günü Tramp məhz Norveçin baş naziri Erna Solberqlə görüş keçirmişdi.

Ağ Ev Trampın belə bir bəyanat səsləndirdiyini inkar etməyib.

“Vaşinqtonda bəzi siyasətçilər vətənin deyil, digər ölkələrin maraqları uğrunda mübarizə aparmağa üstünlük verir, ancaq prezident Tramp hər zaman  Amerika xalqının maraqları uğrunda mübarizə aparacaq”, - deyə ABŞ prezident administrasiyasının nümayəndəsi Rac Şah bildirib.

www.oxu.az