"Vaşinqton və Tehran arasında danışıqlar yaxşı gedir, saziş növbəti həftəsonu, iyunun 6-sı və ya 7-də imzalana bilər".
Oxu.Az "İzvestiya" nəşrinə istinadən xəbər verir ki, bu barədə ABŞ lideri Donald Tramp Ağ Evdə icraedici fərmanların imzalanması zamanı bildirib.
"Bəli, danışıqların özü əslində çox yaxşı keçir. Çox yaxşı. Yəni bu, baş verərsə - baş verməyə də bilər, kim bilir? - amma əgər hər halda baş verərsə, bu, artıq həftəsonu ola bilər", - deyə o əlavə edib.
Trampın sözlərinə görə, Vaşinqton və Tehran arasında əldə olunmuş ilkin razılaşma İranın bombalanmış nüvə obyektlərində uranın birgə hasilatını nəzərdə tutur.
"ABŞ və İran arasındakı razılaşmalar tərəflərin anlaşma memorandumunu imzalamasından dərhal sonra Hörmüz boğazının gəmiçilik üçün açıq olacağını nəzərdə tutur. İran ABŞ ilə müzakirə olunan saziş çərçivəsində təkcə nüvə silahının hazırlanmasından deyil, həm də onun əldə edilməsindən imtina etməyə razılaşıb" , - deyə Ağ Evin rəhbəri əlavə edib.
