Amerikalı milyarder İlon Maskla ABŞ Prezidenti Donald Tramp arasında münaqişə böyüyür.
Oxu.Az xəbər verir ki, dövlət başçısı öz sosial media hesabında Maskın dəli olduğunu bildirib.
"Mən ondan getməsini xahiş etdim, heç kimin istəmədiyi, lakin buna məcbur edildiyi elektrik avtomobilləri mandatını onun əlindən aldım və indi o dəli olub", - deyə Tramp yazıb.
Mask isə əvəzində prezidenti pedofiliyada ittiham edib.
"Tramp barədə həqiqətən böyük bomba partlatmağın vaxtı gəlib. Trampın adı "Epşteyn işi"ndə keçir. Bu işin materiallarının dərc edilməməsinin əsl səbəbi budur.
Gələcək istinad üçün bu postu yadda saxlayın. Həqiqət ortaya çıxacaq", - Mask qeyd edib.
Qeyd edək ki, amerikalı maliyyəçi və biznesmen Ceffri Epşteyn cinsi cinayətlərə görə dünya miqyasında səs-küyə səbəb olub. 2005-ci ildə ona qarşı yetkinlik yaşına çatmayan qızlara qarşı cinsi istismar və insan alveri ilə bağlı ittihamlar irəli sürülüb. 2008-ci ildə o, istintaqla sövdələşməyə gedib və yüngül cəza alıb - cəmi 13 ay həbsxanada yatıb və bu müddətin çox hissəsində xüsusi şərtlərlə azadlıqda olub. 2019-cu ildə Epşteyn yenidən həbs olunub və bu dəfə federal səviyyədə insan alveri ilə bağlı daha ciddi ittihamlarla üzləşib. Onun işində çoxsaylı məşhur siyasətçi, iş adamı və digər nüfuzlu şəxslərlə əlaqələri üzə çıxıb. 2019-cu il avqustun 10-da, məhkəmə prosesi gözlənərkən, Epşteyn Nyu-Yorkdakı həbsxanada ölüb. Məhkəmə-tibb ekspertizasının nəticələrinə görə, ölümün səbəbi intihar olub.
"Mən olmasam, Tramp seçkini uduzardı".
Oxu.Az xəbər verir ki, bunu amerikalı milyarder İlon Mask "X" səhifəsində yazıb.
Bununla da o, ABŞ prezidentinin iş adamı barəsindəki son açıqlamalarına cavab verib.
Almaniya kansleri Fridrix Mertslə görüşdə Tramp əvvəllər Maskla yaxşı münasibətləri olduğunu, lakin indi bunun belə olub-olmadığını bilmədiyini deyib.
"Elondan çox məyus oldum, ona çox kömək etmişəm", - Tramp bildirib.
Qeyd edək ki, daha əvvəl Mask Tramp administrasiyasını tərk edib. Bir qədər sonra isə o, ABŞ prezidentinin xərclər və vergi barədə qanun layihəsini sərt şəkildə tənqid edərək, sənədi "iyrənclik" adlandırıb.
