Türkiyə silahı yerə qoymaq istəməyən PKK-çılara qarşı hərbi əməliyyat planı hazırlayır

Türkiyə rəhbərliyi ölkədə qadağan olunmuş Kürdüstan Fəhlə Partiyasının (PKK) lideri Abdullah Öcalanın çağırışına tabe olmayaraq silahı yerə qoymaqdan imtina etməsi halında hərbi əməliyyatların keçirilməsinə dair plan hazırlayır.

Oxu.Az-ın məlumatına görə, bu barədə "Hürriyet" qəzeti öz mənbələrinə istinadən xəbər yayıb.

"Əgər PKK-nın İraqın şimalındakı Kandil düşərgəsi silahı yerə qoymasa, Öcalan bununla razılaşmayacaq. Çünki bu halda PKK döyüşçüləri öz rəhbərliyini görməzlikdən gəlmiş olacaq. Güman edilir ki, Öcalanın növbəti bəyanatı belə olacaq: "Kandil - Amerika və İsrailin layihəsidir. Bu, mənim deyil, İsrailin, İranın, ABŞ-nin PKK-sıdır". PKK-nın silahı yerə qoyması ehtimalına hazırlıq gedir, eyni zamanda, bunun baş verməyəcəyi hala dair hərbi əməliyyat planları hazırlanır", - deyə qəzet yazıb.

Bundan əvvəl PKK Abdullah Öcalanın çağırışına cavab olaraq Türkiyə ilə atəşkəs elan etdiyini bildirib. Eyni zamanda, partiya liderinin şəxsi iştirakı ilə çağırılacaq konqresdə özünü buraxmaq məsələsini müzakirə etməyə hazır olduğunu açıqlayıb. Öcalan daha əvvəl döyüşçüləri konqres çağırmağa, nəticə olaraq partiyanın buraxıldığını və silahlı dəstələrin tərksilah edildiyini elan etməyə çağırmışdı.

PKK bəyan edib ki, atəşkəs yalnız onlara hücum olunmadığı müddətdə qüvvədə qalacaq. Türkiyə Prezidenti Rəcəb Tayyib Ərdoğan isə PKK-nın hiyləyə əl atacağı və ya prosesi ləngidəcəyi halda hərbi əməliyyatların yenidən başlaya biləcəyini bildirib.

Qəzetin məlumatına görə, PKK-nın tərksilah edilməsi prosesi üçün konkret vaxt çərçivəsi və "yol xəritəsi" müəyyən edilib.

"İki-üç ay ərzində proses izləniləcək. Əgər Kandil silahı yerə qoymağa qərar versə, bunun üçün mexanizmlər müəyyən ediləcək. PKK silahı yerə qoyduqdan sonra təşkilatın liderlərinin taleyi necə olacaq? Silahlar hansı ölkəyə və hansı ünvana təhvil veriləcək? Bunun üçün mexanizmlər yaradılacaq. Silahlar müvafiq qurumlara İraqda Türkiyə və İraq administrasiyasının, Suriyada isə Türkiyə və Suriya hakimiyyətinin nəzarəti altında təhvil veriləcək", - deyə qəzet yazıb.