Türkiyə və Böyük Britaniya arasında 2025-ci ildə əldə edilən razılaşmaya uyğun olaraq, Londondan 20 ədəd "Eurofighter Typhoon" qırıcısı və müvafiq təchizatlar alınacaq.
Oxu.Az xəbər verir ki, bu barədə "Haber Global" məlumat yayıb.
2026-cı ilin mart ayında isə paytaxt Londonda bu hərbi təyyarələrin logistik və texniki təminatı ilə bağlı yeni sənəd imzalanıb. Müqavilə çərçivəsində ehtiyat hissələrinin verilməsi, personalın təlimi və ilk üçillik texniki qulluq həyata keçiriləcək.
Martın 21-də Ordu vilayətinin sahilinə çıxan ABŞ istehsalı olan insansız dəniz aparatı SAS xüsusi təyinatlıları tərəfindən zərərsizləşdirilib. Bununla əlaqədar olaraq, Müdafiə Nazirliyi əhaliyə müraciət edərək naməlum və şübhəli cisimlərə toxunmamağı tövsiyə edib.
Qətər və Türkiyə hərbçilərinin müştərək təlimləri zamanı texniki problem ucbatından helikopter qəzası baş verib, hadisənin səbəbləri araşdırılır. Həmçinin martın 21-də və 24-də ordunun iki mayoru və iki hərbi qulluqçusu şəhid olub.
Regionda müdafiə potensialını artırmaq məqsədilə NATO daxilində çoxmillətli korpus qərargahının yaradılması nəzərdə tutulur.
Qeyd edək ki, ötən həftə ərzində PKK terror təşkilatının iki üzvü silahı yerə qoyaraq təslim olub, onlara məxsus partlayıcı maddələr və minalar zərərsizləşdirilib. Sərhəd təhlükəsizliyi tədbirləri çərçivəsində 107 qeyri-qanuni keçid cəhdinin qarşısı alınıb, ümumilikdə 950 şəxsin sərhədi pozması dayandırılıb.
NATO-nun (Şimali Atlantika Alyansının) qərarına əsasən, İraqdakı missiya yekunlaşıb və Türkiyə hərbi qulluqçuları geri qayıdıblar. Yaxın Şərqdə ABŞ, İsrail və İran arasındakı münaqişənin regionda gərginliyi artırması fonunda Türkiyə rəsmi şəkildə bütün tərəfləri təmkinli olmağa və problemləri diplomatik yollarla həll etməyə çağırıb.
NATO rəhbərliyi bölgədəki son hadisələr fonunda İraqdakı qüvvələri geri çəkmək qərarına gəlib.
Bu barədə Türkiyə Milli Müdafiə Nazirliyinin mətbuat və ictimaiyyətlə əlaqələr müşaviri kontr-admiral Zeki Aktürk nazirliyin həftəlik mətbuat brifinqində çıxışı zamanı məlumat verib.
"Qərara uyğun olaraq, İraqın paytaxtı Bağdadda xidmət edən Türkiyə Silahlı Qüvvələri personalımızın ölkəmizə təxliyəsi uğurla həyata keçirilib. NATO tərəfindən həyata keçirilən geri çəkilmə planı çərçivəsində müttəfiq ölkə personalının təxliyə fəaliyyətlərinə də ölkəmiz tərəfindən dəstək təmin edilib", - deyə Zeki Aktürk bildirib.
O qeyd edib ki, Türkiyə Silahlı Qüvvələri beynəlxalq missiyalar və ikitərəfli münasibətlər çərçivəsində geniş coğrafi ərazidə sülhün bərqərar olmasına və sabitliyin qorunmasına töhfə verməyə davam edir.
