Türkiyənin İstanbul şəhərində gecə klublarına edilən basqınlar zamanı gözlənilməz hadisə baş verib. Daha əvvəl barəsində saxlanılma qərarı olmayan məşhur aktyor Can Yaman gecə klubunda axtarış zamanı üzərində narkotik maddə aşkarlandıqdan sonra saxlanılıb.
Bu barədə Oxu.Az "Hürriyet" nəşrinə istinadən məlumat verir.
Məlumata görə, İstanbul Prokurorluğunun koordinasiyası ilə ötən gecə şəhərin müxtəlif yerlərindəki doqquz lüks gecə klubunda eyni vaxtda əməliyyat keçirilib. "Klein Phönix" və "Bebek Hotel" kimi məşhur məkanları hədəf alan basqınlarda İstanbul Narkotik Cinayətləri ilə Mübarizə İdarəsi və jandarm qrupları iştirak edib. Təxminən 100 polis məkanların giriş-çıxışlarını bağlayaraq ətraflı axtarışlar aparıb.
Qeyd edilir ki, prokurorluq Can Yaman barəsində birbaşa saxlanılma orderi verməyibmiş. Lakin gecə klubunda axtarış zamanı məkanda olan aktyorun üzərindən narkotik maddə tapılıb və bu da onun saxlanılmasına səbəb olub.
Türkiyə KİV-in yazdığına görə, aktyorlar Can Yaman və Selen Görgüzel ilə yanaşı, aralarında Ayşe Sağlam, Ceren Alper və yutuberlərin də olduğu ümumilikdə yeddi nəfər saxlanılıb. Saxlanılanlar arasında "Klein Phönix"in meneceri Burak Fahri Yön və müdiri Ayşe Tarım da var.
Həmçinin daha əvvəl saxlanılan model və aparıcı Melisa Şahinin bu dəfə həbs olunduğu bildirilir. Melisa Şahin "Bu tarz benim" və "İşte benim stilim" realiti-şoularındakı çıxışları ilə tanınırdı. İstanbul Prokurorluğu baş verənlərlə bağlı açıqlama verib.
"İstanbul Prokurorluğunun Qaçaqmalçılıq, Narkotik və İqtisadi Cinayətlər üzrə İstintaq Bürosunun dosyesi çərçivəsində, təlimatlarımıza uyğun olaraq, İstanbul Polis İdarəsinin Narkotik Cinayətləri ilə Mübarizə Şöbəsi tərəfindən 6 müəssisədə, Jandarm Narkotik Cinayətləri ilə Mübarizə Şöbəsi tərəfindən isə 1 müəssisədə axtarış və müsadirə əməliyyatı həyata keçirilib. Axtarışlar zamanı narkotik maddə olduğu güman edilən çox miqdarda maye, qalıq maddə, kokain, marixuana, həblər, həssas tərəzi və sursat aşkarlanıb. İstintaq çərçivəsində 7 şübhəli saxlanılıb", - deyə açıqlamada qeyd edilib.
Prodüser Muzaffer Yıldırıma məxsus "Bebek Hotel"ə edilən basqın zamanı hotelin kazinoya çevrildiyi iddia edilib. İddialara görə, Yıldırımın iqamətgahında aparılan axtarış zamanı kazino işçisi, assistent və təmizlik işçisi dəlilləri məhv etməyə çalışarkən saxlanılıbla.
Qeyd olunub ki, prokurorluq hotelin sahibi Muzaffer Yıldırımın bu məkandan narkotik məclisləri üçün istifadə etdiyini iddia edir. Axtarışda iştirak edən 200 jandarm hoteldə "gizli otaq" aşkar edib. Bu otağın səsyazmaların aparıldığı bir yer olduğu ilə bağlı da fikirlər irəli sürülüb.
