Türkiyənin cənub və qərb bölgələrində davam edən son üç aktiv meşə yanğını nəzarət altına alınıb.
Oxu.Az "TRT Haber" telekanalına istinadən xəbər verir ki, bu barədə Türkiyənin kənd təsərrüfatı və meşəçilik naziri İbrahim Yumaklı məlumat verib.
Nazirin sözlərinə görə, havadan və qurudan həyata keçirilən intensiv müdaxilə nəticəsində Aydın vilayətinin Çine, Balıkesir vilayətinin Susurluk və İzmir vilayətinin Buca rayonlarında baş vermiş meşə yanğınları tam nəzarət altına alınıb.
İbrahim Yumaklı bildirib ki, iyulun 29-dan etibarən Türkiyədə ümumilikdə 314 təbiət yanğını qeydə alınıb.
Türkiyə Prezident Administrasiyasının İctimaiyyətlə Əlaqələr İdarəsinin məlumatına əsasən, yanğınların söndürülməsi əməliyyatlarına 28 təyyarə, 119 helikopter, 14 pilotsuz uçuş aparatı (PUA) və 5 mindən çox quru texnikası cəlb edilib.
