Ulduzların "sirri" Trampa təsir etmədi: "Heç olmasa dostumun ürəyi rahat olur"

ABŞ Prezidenti Donald Tramp ölkənin əhalisi tərəfindən arıqlamaq üçün tez-tez istifadə olunan məşhur diabet dərmanı "Ozempic" haqqında fikirlərini bildirib. O bu preparatı effektsiz adlandırıb.

Oxu.Az-ın verdiyi məlumata görə, Ağ Ev rəhbəri bu barədə "Fox News" telekanalına verdiyi müsahibədə danışıb.

Trampın sözlərinə görə, onun artıq çəkidən əziyyət çəkən dostlarından biri bu dərmanı Londonda alıb.

"Mən ona köklər üçün iynə deyirəm. Düzünü desəm, bu dərmanın işlədiyinə inanmıram, amma heç olmasa dostumun ürəyi bir az rahat olur", - deyə dövlət başçısı vurğulayıb.

Ağ Evin rəhbəri onu da bildirib ki, həmin dostunun adını açıqlamamağa söz verib, çünki dostu ictimaiyyətə ifşa olunmaqdan qorxur. Lakin o da əlavə edib ki, Londonda bu dərman ABŞ-dən 15 dəfə ucuz başa gəlir.

Xatırladaq ki, "Ozempic" ikinci tip şəkərli diabet xəstələri üçün qlükoza səviyyəsini normallaşdırmağa kömək edən dərmandır. Bu vasitə təbii GLP-1 hormonunun təsirini gücləndirir və iki əsas mexanizmi işə salır: beyinin aclıq mərkəzinə təsir edərək iştahanı azaldır və mədənin boşalmasını yavaşladaraq toxluq hissini uzadır - bütün bu təsirlər birgə olaraq insanın zəhmətsiz şəkildə arıqlamasına imkan yaradır. Məhz bu xüsusiyyətinə görə "Ozempic" Hollivud ulduzları və digər məşhurlar arasında son dərəcə populyarlaşıb.