İsrail Hərbi Hava Qüvvələri "Wizz Air" aviaşirkətinin sərnişin təyyarəsini müşayiət etmək üçün qırıcı təyyarələri havaya qaldırıb. Buna səbəb təyyarənin göyərtəsindəki bir uşağın öz telefonunda "Wi-Fi"ın giriş nöqtəsini "terrorçu" adlandırması olub.
Oxu.Az-ın xəbərinə görə, bu barədə "Daily Mail" nəşri məlumat verib.
"Wizz Air" təyyarəsi Luton hava limanından yola düşüb və Ben-Qurion hava limanına doğru istiqamət götürüb, bu zaman sərnişinlərdən biri telefonunda mesaj görüb və bu mesajı təhlükə kimi qiymətləndirib.
Daha sonra məlum olub ki, mesaj uşağın öz telefonunda yaratdığı "Wi-Fi" giriş nöqtəsinin adıdır və uşaq onu "terrorçu" kimi qeyd edib. Qeyri-adi ad sərnişinlər və ekipaj arasında tez zamanda həyəcana səbəb olub və bundan sonra təhlükəsizlik tədbirləri işə salınıb.
İnsident fonunda İsrail Hərbi Hava Qüvvələri təyyarəni Təl-Əvivə qədər müşayiət etmək üçün bir neçə qırıcı təyyarəni havaya qaldırıb. Enişə qədər təyyarə Aralıq dənizi üzərində üç dəfə dövrə vurub.
Ben-Qurion hava limanına eniş etdikdən sonra sərnişinlər və onların baqajları diqqətlə yoxlanılıb və yoxlamada, o cümlədən partlayıcı maddələrin aşkarlanmasında ixtisaslaşmış kinoloqlar da iştirak edib. Bu müddət ərzində hakimiyyət orqanları bütün uçuşların qəbulunu və yola düşməsini müvəqqəti olaraq dayandırıb.
İsrail Hava Limanları İdarəsinin nümayəndəsi bildirib ki, yoxlamadan sonra real təhlükənin olmadığı müəyyən edilib və hava nəqliyyatı tezliklə normal rejimə qayıdıb.
