"Bloomberg" agentliyi tərəfindən tərtib edilən milyarderlər indeksində tarixdə birinci dəfə olaraq ilk on yeri yalnız ABŞ vətəndaşları tutub.
Oxu.Az xəbər verir ki, bu barədə məlumat agentliyin rəsmi saytında dərc olunub.
Bu vəziyyətin yaranmasına təsir edən əsas amillərdən biri LVMH (Louis Vuitton Moet Hennessy) şirkətlər qrupunun rəhbəri Bernar Arnonun ilk onluqdan kənarda qalması olub. Yaxın Şərqdə davam edən müharibənin şirkətin biznesinə ciddi zərbə vurması nəticəsində onun sərvəti 143 milyard dollara qədər geriləyib.
Nəticədə reytinqdə onun yerini "Berkshire Hathaway" şirkətinin sədri Uorren Baffet tutub. Siyahının birinci pilləsində böyük fərqlə "SpaceX" şirkətinin qurucusu İlon Mask qərarlaşıb. Onun ümumi sərvəti 918.8 milyard dollar təşkil edir. Liderin ardınca texnologiya şirkətlərinin rəhbərləri, o cümlədən "Google"un həmtəsisçiləri Larri Peyc və Sergey Brin, "Amazon"un yaradıcısı Ceff Bezos və "Dell" şirkətinin rəhbəri Maykl Dell gəlirlər.
