Bakı-Şamaxı-Yevlax yolunun Ağsu aşırımından (dolaylarından) keçən hissəsində torpaq sürüşməsi qeydə alınıb. Hadisə yolun 147-ci kilometrliyində baş verib. Sürüşmə nəticəsində asfalt örtüyünün bir hissəsi dağılıb, yolda iri çatlar və yarğanlar yaranıb. Hazırda magistralın bir zolağında hərəkət məhdudlaşdırılıb və sürücülər hərəkəti tək zolaqla davam etdirirlər.
Sürücülər Baku TV-yə ərazidə hərəkətin son dərəcə təhlükəli olduğunu bildiriblər. Şikayətçilərdən biri vəziyyəti belə təsvir edib:
"Şamaxıdan Ağsu istiqamətinə gedən sürücülər ehtiyatlı olsunlar. Yolun problemli hissəsi görünməyən döngədə yerləşir, bu isə qəza şəraiti yaradır. Yolun bir tərəfi tamamilə dağılıb. İki maşın qarşı-qarşıya gələndə vəziyyət daha da kritikləşir. Gecə saatlarında isə hərəkət etmək demək olar ki, qeyri-mümkündür".
Digər sürücü isə yolun hələ də təmir olunmamasından narahatlığını ifadə edib:
"Yoldan keçərkən qorxu hissi keçiririk, maşın hər an aşa bilər. Aidiyyəti qurumlar gəlib bura baxsınlar, yol bərbad gündədir".
Ağsu dolaylarında baş verən torpaq sürüşməsinə görə əraziyə mütəxəssislər cəlb olunublar.
Oxu.Az xəbər verir ki, bu barədə Azərbaycan Avtomobil Yolları Dövlət Agentliyinin mətbuat xidmətinin rəhbəri Anar Nəcəfli AZƏRTAC-a açıqlamasında məlumat verib.
Qeyd edib ki, mütəxəssislər artıq əraziyə baxış keçiriblər:
"Problemin aradan qaldırılması üçün müvafiq təkliflər hazırlanaraq aidiyyəti qurumlara təqdim ediləcək. Maliyyə vəsaiti ayrıldıqdan sonra ərazidə bərpa işlərinə başlanılması nəzərdə tutulur".
Ağsu aşırımı ərazisində torpaq sürüşməsi yenidən aktivləşib. Son günlər ölkənin dağlıq və dağətəyi bölgələrində müşahidə olunan intensiv yağıntılar Bakı-Şamaxı-Yevlax avtomobil yolunun Ağsu aşırımından keçən hissəsində fəsadlara səbəb olub. Yolun 147-ci kilometrliyində baş verən sürüşmə nəticəsində asfalt örtüyündə dərin çatlar və çökmələr əmələ gəlib.
Oxu.Az AZƏRTAC-a istinadən xəbər verir ki, sürüşmə, əsasən, yolun bir hərəkət zolağında qeydə alınıb. Nəticədə yolun mühafizə zolağı və çiyin hissəsi tamamilə yararsız vəziyyətə düşüb. Təhlükə nəzərə alınaraq ikizolaqlı avtomobil yolunun bir hissəsi bağlanıb və nəqliyyat vasitələrinin hərəkəti müvəqqəti olaraq bir zolaq üzrə təşkil edilib.
Əraziyə xəbərdaredici nişanlar yerləşdirilib, təhlükəli hissə xüsusi lentlərlə işarələnib. Yol polisi tərəfindən hərəkətə nəzarət edilir, sürücülərə sürət həddini minimuma endirmək və ehtiyatlı olmaq tövsiyə olunur.
Xatırladaq ki, sözügedən ərazidə ötən ilin yaz aylarında da torpaq sürüşməsi baş vermişdi.
