Apreldə KTM-ə zəhərlənmə səbəbi ilə 126 nəfər gətirilib, onlardan 4-ü ölüb

Aprel ayı ərzində Kliniki Tibbi Mərkəzin (KTM) Toksikologiya şöbəsinə zəhərlənmə səbəbi ilə 126 nəfər qəbul edilib.

Bu barədə Oxu.Az-a KTM-dən məlumat verilib.

Bildirilib ki, şöbəyə qəbul edilən xəstələrdən 68 nəfər dərmandan, 34 nəfər sirkə turşusundan, altısı ilan sancmasından, biri spirtli içkidən zəhərlənən şəxslərdir.

Həmçinin onlardan 4 nəfər dəm qazından, 5 nəfər allergik reaksiyadan, 4 nəfər botulizmdən, bir nəfər anafilaktik şok, bir nəfər yandırıcı məhluldan, bir nəfər neft məhlulundan, bir nəfər yabanı bitkilərdən zəhərlənmə səbəbi ilə şöbəyə yerləşdirilib.

Həkimlərin səylərinə baxmayaraq, zəhərlənən şəxslərdən 4 nəfər (üç kişi, bir qadın ) dünyasını dəyişib. Ölüm halları sirkə turşusu və dərman zəhərlənmələrindən qeydə alınıb.