Qubadlı rayonunda qəzaya düşən şəxslər Bakıya gətiriliblər.
Bu barədə Oxu.Az-ın sorğusuna cavab olaraq TƏBİB-dən bildirilib.
Qeyd edilib ki, Qubadlı rayonu ərazisində baş verən yol-nəqliyyat hadisəsi səbəbilə xəsarət alan 4 nəfər (kişi cinsli) Füzuli Rayon Mərkəzi Xəstəxanasına hospitalizasiya olunub. Onlara bədənin müxtəlif nahiyələrinin çoxsaylı travması diaqnozu təyin olunub.
Xəsarət alan şəxslərdən 2001-ci il təvəllüdlü şəxs Elmi-Tədqiqat Travmatologiya və Ortopediya İnstititutuna, 1994-cü il təvəllüdlü şəxs isə Sumqayıt Şəhər Təcili Tibbi Yardım Xəstəxanasına təxliyə olunub. 1999 və 1994-cü il təvəllüdlü şəxslərə isə zəruri tibbi yardım göstərilib və onlar ambulator müalicə üçün evə buraxılıblar.
Bakıdan azad olunmuş ərazilərə səfər edən şəxslər qəzaya düşüblər.
Oxu.Az-ın məlumatına görə, hadisə bu gün Qubadlı rayonu ərazisində baş verib.
Belə ki, KIA markalı avtomobil idarəetmədən çıxaraq aşıb.
Hadisə nəticəsində avtomobildə olan dörd nəfər - Sumqayıt şəhər sakini İlqar Elşən oğlu Heydərov, Bakı şəhər sakinləri İntiqam Mətləb oğlu Alkərəmov, Rauf Rafael oğlu Əliyev və Məhəmməd Zülfüqar oğlu Mütəllimov - xəstəxanaya yerləşdirilib.
Faktla bağlı araşdırma aparılır.
Samir Əli
