Bakıda qonşular arasında dava qanla bitdi

Bakıda qonşular arasında dava qanla bitdi.

Oxu.Az Xəzər TV-yə istinadla xəbər verir ki, hadisə Xətai rayonu, Əliağa Şıxlinski küçəsində baş verib.

Qayınatasının evinə qonaq gələn şəxs və atası ilə qonşuları arasında baş verən mübahisə zamanı onlara çoxsaylı bıçaq zərbələri endirilib.

Şahidlərin sözlərinə görə, dava söyüş üstündə yaranıb. Ərazidə yaşayan şəxslər bildiriblər ki, hadisəni törədən şəxs ilə tez-tez problem yaşamaqdan yorulublar.

Məsələ ilə bağlı Tibbi Ərazi Bölmələrini İdarəetmə Birliyindən (TƏBİB) verilən məlumata görə, 52 və 20 yaşlı şəxslərə döş qəfəsinin kəsilmiş-deşilmiş yarası diaqnozu qoyulub və onlar dərhal cərrahi əməliyyata alınıblar. Hazırda vəziyyətləri stabil qiymətləndirilir.

Xəsarət alanlardan biri - 21 yaşlı şəxs isə dodaq və ağız boşluğunun yarası, əl və biləyin açıq yarası diaqnozu ilə zəruri tibbi yardımlar aldıqdan sonra öz istəyilə ambulator müalicə üçün evə buraxılıb.

Polis əməkdaşlarının keçirdikləri əməliyyat tədbirləri nəticəsində cinayəti törətməkdə şübhəli bilinən 24 yaşlı şəxs saxlanılıb.

Faktla bağlı cinayət işi açılıb.

Mövzu ilə bağlı daha ətraflı videomaterialı təqdim edirik:

Bakıda qonşular arasında dava qanla bitdi

11 dekabr, 10:00

Dekabrın 10-u saat 21 radələrində paytaxtın Xətai rayonu Ə.Şıxlinski küçəsində 1972-ci il təvəllüdlü K.Bağırova və oğlu 2004-cü il təvəllüdlü C.Bağırova münaqişə zəminində deşici alətlə xəsarətlər yetirilib.

Bu barədə Oxu.Az-a Daxili İşlər Nazirliyinin (DİN) Mətbuat Xidmətindən məlumat verilib.

Bildirilib ki, polis əməkdaşlarının keçirdikləri tədbirlərlə əməli törətməkdə şübhəli bilinən 2000-ci il təvəllüdlü Y.Mehdiyev saxlanılıb.

Faktla bağlı Cinayət Məcəlləsinin müvafiq maddəsilə cinayət işi başlanılıb.

Hazırda istintaq araşdırması davam etdirilir.

09:38

Bakının Xətai rayonunda dava zamanı üç nəfər xəsarət alıb.

Oxu.Az APA-ya istinadən xəbər verir ki, hadisə Əliağa Şıxlınski küçəsində qeydə alınıb.

Belə ki, 1972-ci il təvəllüdlü Kamil Bağırov və oğlu, 2004-cü il təvəllüdlü Cavid Bağırov qonşuluqda yaşayan şəxslə dava zamanı bıçaqlanıblar.

2003-cü il təvəllüdlü Qabil Mehdiyev isə dava zamanı başından xəsarət alıb.

Yaralılar xəstəxanaya yerləşdiriliblər.

Faktı Xətai Rayon Polis İdarəsinin əməkdaşları araşdırırlar.