Bakıda şagirdlər arasında mübahisə acı sonluqla bitib.
Oxu.Az Xəzər TV-yə istinadən xəbər verir ki, hadisə bu gün səhər saatlarında paytaxtın Nizami rayonunda yerləşən məktəblərdən birində baş verib.
Məktəb işçilərinin sözlərinə görə, xəsarət alan şagird nümunəvi şagird olub və tərbiyəsi ilə seçilib.
Məktəbdə təhsil alan digər uşaqlar bildiriblər ki, şagirdin yıxılmasına səbəb sinif yoldaşları ilə arasında baş vermiş mübahisə olub. 14 yaşlı uşaq pəncərədən yıxılaraq başından və belindən xəsarət alıb.
Uşağın anası övladının vəziyyətinin qənaətbəxş olduğunu bildirib.
Ətraflı süjetdə:
Bakının Nizami rayonunda yerləşən 220 nömrəli məktəb-liseyində intihara cəhd edən şagird xəstəxanadan evə buraxılıb.
Bu barədə Oxu.Az-ın sorğusuna cavab olaraq Tibbi Ərazi Bölmələrini İdarəetmə Birliyindən məlumat verilib.
"Aprelin 11-də saat 13:00-da Respublika Təcili və Təxirəsalınmaz Tibbi Yardım Mərkəzinə Nizami rayonu, 220 saylı orta məktəbdən müraciət qeydə alınıb.
Dərhal çağırış ünvanına briqada cəlb olunub. 2011-ci il təvəllüdlü şəxs (kişi cinsli) Sabunçu Tibb Mərkəzinə hospitalizasiya olunub.
Pasiyentə belin küt travması diaqnozu təyin edilib. Zəruri tibbi yardımlar göstərilən şəxs ambulator müalicə üçün evə buraxılıb", - məlumatda qeyd olunub.
Bakının Nizami rayonunda yerləşən 220 nömrəli məktəb-liseyində şagird intihara cəhd edib.
Oxu.Az-ın əldə etdiyi məlumata görə, məktəbin VIII sinif şagirdi dərs zamanı ikinci mərtəbədən özünü atıb.
Bakı Şəhər Təhsil İdarəsindən Oxu.Az-ın sorğusuna cavab olaraq bildirilib ki, sözügedən hadisə barəsində araşdırma aparılır:
"220 nömrəli məktəb-liseyin VIII sinif şagirdi (müvafiq səbəbdən şagirdin adı qeyd olunmur) II mərtəbənin pəncərəsindən yıxılıb.
Məktəb rəhbərliyi tərəfindən dərhal təcili-tibbi yardım çağırılıb. Şagirdə ilkin tibbi yardım göstərilib və səhiyyə müəssisəsinə aparılıb. Onun vəziyyətinin qənaətbəxş olduğu bildirilir.
Məsələ ilə əlaqədar şagirdin valideynlərinə və aidiyyəti qurumlara məlumat verilib. Məsələ aidiyyəti qurumlar tərəfindən nəzarətə götürülüb və müvafiq araşdırmalara başlanılıb. Həmçinin məktəbdaxili araşdırma çərçivəsində şagirdin sinif yoldaşları və müəllimlərlə söhbət aparılır", - deyə məlumatda qeyd olunub.
Aygün Mirakif
