Qaradağ rayonu, Sahil qəsəbəsi ərazisindən yol-nəqliyyat hadisəsi zamanı xəsarət alanlar Klinik Tibbi Mərkəzə hospitalizasiya ediliblər.
Bu barədə Oxu.Az-ın sorğusuna cavab olaraq Tibbi Ərazi Bölmələrini İdarəetmə Birliyindən (TƏBİB) məlumat verilib.
"Yanvarın 4-ü saat 10:40-da Qaradağ rayonu, Sahil qəsəbəsi ərazisindən yol-nəqliyyat hadisəsi ilə bağlı Respublika Təcili və Təxirəsalınmaz Tibbi Yardım Mərkəzinə çağırış daxil olub.
Dərhal hadisə yerinə briqada cəlb olunub.
Xəsarət alan iki nəfər müştərək travmalar diaqnozu ilə Kliniki Tibbi Mərkəzə hospitalizasiya olunub.
Bir nəfərin həkiməqədər ölüm faktı qeydə alınıb, bir nəfərə isə stresə qarşı reaksiya diaqnozu ilə yerində yardım olunub", - deyə məlumat da qeyd olunub.
Kliniki Tibbi Mərkəzdən isə Oxu.Az-a bildirilib ki, 1982 və 1999-cu il təvəllüdlü şəxslər (qadın cinsli) başın açıq yarası, belin yüngül əzilməsi, fəqərə sınığı diaqnozları ilə Kliniki Tibbi Mərkəzin Təcili və Təxirəsalınmaz Tibbi Yardım şöbəsinə hospitalizasiya edilib:
"Yaralılara ilkin tibbi yardım göstərilib və zəruri tibbi müayinələrdən keçirilib. Hazırda vəziyyətləri stabil qiymətləndirilir".
Sahil qəsəbəsini metronun "Sahil" stansiyası ilə əlaqələndirən 149 nömrəli avtobusun iştirakı ilə qəza baş verib.
Bu barədə Oxu.Az-ın sorğusuna cavab olaraq Azərbaycan Yerüstü Nəqliyyat Agentliyindən (AYNA) məlumat verilib.
"Yanvarın 4-ü səhər saatlarında Bakı-Ələt yolunda Sahil qəsəbəsini metronun "Sahil" stansiyası ilə əlaqələndirən 149 nömrəli avtobusun iştirakı ilə baş verən qəza hüquq-mühafizə orqanları tərəfindən araşdırılır. İctimaiyyətə əlavə məlumat veriləcək", -deyə məlumatda qeyd olunub.
Bakı-Qazax magistral yolunda "BakuBus" avtobusu ilə yük avtomobili toqquşub.
Bununla bağlı Oxu.Az-a hadisə yerindən görüntülər daxil olub:
Hadisə ilə bağlı Oxu.Az-a açıqlamasında Baş Dövlət Yol Polisi İdarəsinin (BDYPİ) inspektoru polis baş leytenantı Elvin Hacıyev deyib ki, ilkin məlumata görə, "BakuBus" avtobusunun içərisindəki bir sərnişin həlak olub:
"Hadisə Bakı-Qazax magistral yolunun 24-cü kilometrliyində saat 10:30-da baş verib. Yol kənarındakı, Tacikistan dövlətinə məxsus 77-FF-02 nömrə nişanlı "Volvo" markalı TIR hərəkətə başlayarkən 99-JZ-185 dövlət nömrə nişanlı "BakuBus" avtobusu ona çırpılıb. İlkin məlumata görə, "BakuBus" avtobusundakı bir sərnişin həlak olub, iki nəfər xəsarət alıb. Faktla bağlı araşdırma aparılır".
Aygün Mirakif
