Göygöldə iki nəfərin ölümü, iki nəfərin isə ağır yaralanması ilə nəticələnən qəzadan sonra duracağa aparılan avtomobil orada yanıb.
Oxu.Az APA-ya istinadən xəbər verir ki, hadisə Şəmkir rayonunda qeydə alınıb.
Belə ki, Bakı-Qazax magistral yolunun Göygöl rayonu ərazisindən keçən hissəsində idarəetmədən çıxaraq dəmir arakəsməyə, daha sonra isə yolun kənarına aşan avtomobil Şəmkir rayonunda yerləşən duracağa gətirildikdən sonra yanıb.
Dərhal hadisə yerinə Fövqəladə Hallar Nazirliyinin Dövlət Yanğından Mühafizə Xidmətinin Şəmkir Rayon Dövlət Yanğından Mühafizə Hissəsinin yanğınsöndürən maşınları və canlı qüvvəsi cəlb edilib.
Faktla bağlı araşdırma aparılır.
Göygöldə baş verən yol-nəqliyyat hadisəsi zamanı xəsarət alanların vəziyyəti açıqlanıb.
Bu barədə Oxu.Az-a Tibbi Ərazi Bölmələrini İdarəetmə Birliyindən (TƏBİB) məlumat verilib.
"Noyabrın 3-ü saat 00:30-da baş verən yol-nəqliyyat hadisəsi səbəbi ilə iki nəfər (kişi) Göygöl Rayon Mərkəzi Xəstəxanasının Təcili tibbi yardım şöbəsinə hospitalizasiya olunub.
Müxtəlif bədən xəsarətləri alan şəxslərə ilkin tibbi xidmətlər göstərilib. Pasiyentlər daha ixtisaslı tibbi xidmət almaq üçün Gəncə Şəhər Mərkəzi Xəstəxanasının nəzdindəki Abbas Səhhət adına xəstəxanaya təxliyə olunublar.
Tibb müəssisəsinin müvafiq şöbəsində zəruri tibbi xidmətlər göstərilən bir nəfərin müalicəsi davam etdirilir, vəziyyəti stabildir. Vəziyyəti qənaətbəxş qiymətləndirilən bir nəfər isə ambulator müalicə üçün evə buraxılıb", - məlumatda qeyd olunub.
Aygün Mirakif
Göygöl rayonunda baş vermiş avtomobil qəzasında xəsarət alanların kimliyi məlum olub.
Oxu.Az "Report"a istinadən xəbər verir ki, "Mercedes" markalı avtomobilin aşması nəticəsində rayonun Qızılca kənd sakinləri, 2008-ci il təvəllüdlü Sənan Əsgərov və 2009-cu il təvəllüdlü Tunar Süleymanov xəsarət alıblar.
Qəza zamanı ağır xəsarət alan daha iki nəfər hadisə yerində ölüb. Onların kimliyi hələlik məlum deyil.
Faktla bağlı araşdırma aparılır.
Göygöldə ölümlə nəticələnən ağır yol-nəqliyyat hadisəsi baş verib.
Oxu.Az xəbər verir ki, hadisə Bakı-Qazax magistral yolunun rayon ərazisindən keçən hissəsində qeydə alınıb.
Belə ki, hərəkətdə olan minik avtomobili idarəetmədən çıxaraq yolun kənarına aşıb.
Qəza nəticəsində 2 nəfər hadisə yerində ölüb, 2 nəfər isə ağır yaralanıb.
Faktla bağlı araşdırma aparılır.
