Tərtər Rayon Məhkəməsində Beynəlxalq Avrasiya Mətbuat Fondunun (BAMF) Tərtər rayon şöbəsinin rəhbərinə böhtan atmaqda təqsirləndirilən Validə Ağayevanın barəsində olan cinayət işi üzrə məhkəmə prosesi başa çatıb.
Oxu.Az-ın məlumatına görə, prosesdə təqsirləndirilən şəxsə hökm oxunub. Məhkəmənin hökmü ilə V.Ağayevaya qazancından 10 faiz pul dövlət nəfinə tutulmaqla 8 ay islah cəzası təyin edilib.
İttihama görə, V.Ağayeva BAMF-nin beynəlxalq donor tərəfdaşı - Minalar üzrə Məşvərət Qrupu (MAG) təşkilatının maliyyə dəstəyi ilə birgə həyata keçirdiyi Azərbaycanda ilk dəfə olaraq yaradılan qadın minaaxtaranlar layihəsində çalışıb. 2024-cü ilin oktyabr ayından etibarən sözügedən layihə çərçivəsində donorun maliyyə dəstəyi layihənin Ədliyyə Nazirliyindən qeydiyyat prosesi tamamlanmadığına görə dayanıb və layihə heyətinin növbəti 3 ay müddətinə (oktyabr, noyabr, dekabr) bütün əməkhaqqı xərcləri təşkilatın (BAMF-nin) özü tərəfindən tam şəkildə ödənilib. Daha sonra layihə yekunlaşdığına görə bütün işçilərlə, o cümlədən V.Ağayeva ilə olan müqaviləyə xitam verilib. V.Ağayeva bundan sonra "TikTok" və "YouTube" platformasında yayımlanan videomaterialda BAMF-nin Tərtər rayonunda yerləşən regional ofisinin qarşısında dayanaraq təşkilatın rəhbərinin və digər şəxslərinin barəsində qərəzli şəkildə yalan və şər-böhtan xarakterli, nüfuzdan salmaqla rüsvayedici və həqiqətə uyğun olmayan fikirlər səsləndirməyə başlayıb.
Təşkilat rəhbəri məsələ ilə bağlı məhkəməyə müraciət edib.
Samir Əli
