Mingəçevirdə güclü küləyin fəsadları: 120 ağac qırılıb, 25-dən çox tikiliyə ziyan dəyib

Güclü külək nəticəsində Mingəçevir şəhəri ərazisində 120 ədəd ağac qırılıb, küçələrdə nəqliyyat vasitələrinin hərəkətinə maneə yaranıb.

Oxu.Az xəbər verir ki, bu barədə Mingəçevir şəhər Fövqəladə Hallar Komissiyası məlumat yayıb.

Qeyd olunub ki, 15 yaşayış binasının dam örtüyünü külək uçurub, 9 fərdi evin dam örtüyünə ziyan vurub, 3 ədəd fərdi evin həyətində daş hasar aşıb. Qopan dam örtüyünün şiferləri 3 nəqliyyat vasitəsinin üzərinə düşərək zədələyib, 1 səhiyyə, 1 mədəniyyət, 3 təhsil müəssisəsinin binasının dam örtüyünə, 1 yanacaqdoldurma məntəqəsinə ziyan dəyib.

Bundan başqa, telefon, işıq və internet xətləri qırılıb. Şəhərdə elektrik enerjisinin təchizatında fasilə yaranıb.

Bildirilib ki, şəhər Fövqəladə Hallar Komissiyası tərəfindən dərhal təxirəsalınmaz tədbirlər həyata keçirilməyə başlanıb, hazırda bərpa işləri davam etdirilir.

Mingəçevirdə güclü küləyin fəsadları: 120 ağac qırılıb, 25-dən çox tikiliyə ziyan dəyib

14:30

Mingəçevirdə güclü külək nəticəsində bir neçə avtomobilə ziyan dəyib.

"Unikal"ın məlumatına görə, şəhərin Nizami küçəsində 5 mərtəbəli binanın dam örtüyü uçaraq biri KIA, ikisi isə "Mercedes" olmaqla üç avtomobilin üzərinə düşüb.

Nəqliyyat vasitələrinə ziyan dəyib. Şəhərdə 70-ə qədər ağacın aşdığı bildirilir.

12:18

Güclü külək Mingəçevir şəhərində bir sıra fəsadlar törədib.

Oxu.Az "Unikal"a istinadən xəbər verir ki, gecə saatlarından başlayan külək ağacları aşırıb. Bir sıra ərazilərdə elektrik naqillərinin qırılması baş verib.

Küləyin təsirindən aşan ağaclardan biri şəhərin mərkəzi xəstəxanasının üzərinə düşüb.

Qeyd edək ki, Mingəçevir Şəhər İcra Hakimiyyətində iclas keçirilir, fəsadların miqyası müəyyən edilir.