Bakı-Quba yolunun qəza səbəbilə bağlanan hissəsində avtomobillərin hərəkəti bərpa olunub

Bakı-Quba-Rusiya Federasiyası dövlət sərhədi avtomobil yolunda qəzaya uğrayan yük avtomobili yolun hərəkət hissəsindən kənarlaşdırılıb, yolda hərəkət bərpa olunub.

Oxu.Az AZƏRTAC-a istinadən xəbər verir ki, bu gün səhər saatlarında yolun Siyəzən rayonu ərazisindən keçən hissəsində qeydə alınan hadisə zamanı Bakı şəhər sakini Elşad Hökmulla oğlu Rəhimovun idarə etdiyi 99-ZD-308 dövlət qeydiyyat nişanlı yük maşını yolun hərəkət hissəsindən aşıb.

Qəza zamanı heç kəs xəsarət almasa da, avtomobilə və yol təsərrüfatına ciddi ziyan dəyib. Qəzaya uğrayan yük avtomobili yolun hərəkət hissəsini bağladığından təhlükəsizlik tədbirləri ilə əlaqədar Bakı istiqamətində avtomobillərin hərəkəti məhdudlaşdırılıb. Sürücülər axşam saatlarına qədər alternativ olaraq Siyəzən şəhərindən keçən yoldan istifadə ediblər.

Hadisə yerinə Dövlət Yol Polisi (DYP) və digər müvafiq qurumların əməkdaşları cəlb olunublar.

Qəzanın fəsadları aradan qaldırıldıqdan sonra yolda avtomobillərin hərəkəti bərpa olunub.

12:32

Bakı-Quba avtomobil yolunun Siyəzən rayonundan keçən hissəsində yol-nəqliyyat hadisəsi baş verib.

Oxu.Az-a Fövqəladə Hallar Nazirliyindən (FHN) verilən məlumata görə, hadisə yerinə Dövlət Yanğından Mühafizə Xidmətinin qüvvələri cəlb olunub.

Əməliyyat şəraitinin qiymətləndirilməsi zamanı qoşqusunda 39 ton yanacağı olan DAF markalı yanacaqdaşıyan avtomobilin idarəetməni itirərək aşması nəticəsində yol-nəqliyyat hadisəsinin baş verdiyi və yanacağın ətrafa dağılması ilə yanğın-partlayış təhlükəsinin yarandığı müəyyən olunub.

Hazırda yanğınsöndürənlər tərəfindən mümkün yanğın-partlayış təhlükəsinin aradan qaldırılması istiqamətində müvafiq tədbirlər həyata keçirilir.

Bakı-Quba yolunun qəza səbəbilə bağlanan hissəsində avtomobillərin hərəkəti bərpa olunub

11:52

Bakı-Quba-Rusiya Federasiyası dövlət sərhədi avtomobil yolunda yanacaq daşıyan yük avtomobili aşıb.

Oxu.Az xəbər verir ki, hadisə yolun Siyəzən rayonu ərazisindən keçən hissəsində qeydə alınıb.

Qəza nəticəsində hazırda Bakı istiqamətində avtomobillərin hərəkəti müvəqqəti məhdudlaşdırılıb, alternativ yoldan istifadə olunur.

Hadisə yerinə Dövlət Yol Polisi və digər müvafiq qurumların əməkdaşları cəlb olunublar.