"Anama demişdim ki, gəl, bayramı birlikdə keçirək" - Təyyarə qəzasında həlak olan Leyla Bayramovanın qızı

"Anama demişdim ki, gəl, bayramı birlikdə keçirək, səni görmək istəyirəm. Onun üçün çox darıxmışdım".

Oxu.Az xəbər verir ki, bu sözləri Baku TV-yə açıqlamasında AZAL-a məxsus sərnişin təyyarəsinin Qazaxıstanın Aktau şəhəri yaxınlığında dekabrın 25-də qəzaya uğraması nəticəsində həlak olan 1963-cü il təvəllüdlü Leyla Bayramovanın qızı Günel Hüseynova deyib:

"Anam mənim sözümü heç vaxt yerə salmırdı. Nə desəm, onu edərdi, kaş, bu dəfə etməzdi. Ona söylədim ki, birlikdə deyib-gülüb bayramı keçirək. Mən Qroznıda yaşayıram, onu qarşılamağa aeroporta getmişdim. Onu çox gözlədim, elə gözüm yolda qalmışdı. Gördüm ki, hamı qarışıb bir-birinə. Dedilər təyyarə yerə düşüb, sonra mənim halım pis oldu. Dedim ki, anam heç vaxt məni tək qoymaz. Çünki o, məni sevindirməyə gəlmişdi, ağlatmağa yox. Mənim hələ də ümidim var. İnanmıram ki, anam ölüb, o, sağ gələcək. Çünki ürəyim də rahatdı və anam da heç vaxt məni qoymaz ki, bu qədər ağlayım. Mən möhkəm olmalıyam, çünki anam gələndə o bilməməlidi ki, mən incimiş və ağlamışam. Bilirəm ki, anam salamat gələcək".

Daha ətraflı videomaterialda:

"Anama demişdim ki, gəl, bayramı birlikdə keçirək" - Təyyarə qəzasında həlak olan Leyla Bayramovanın qızı

29 dekabr, 18:22

AZAL-a məxsus sərnişin təyyarəsinin Qazaxıstanın Aktau şəhəri yaxınlığında dekabrın 25-də qəzaya uğraması nəticəsində həlak olan 1963-cü il təvəllüdlü Leyla Bayramova ilə vida mərasimi başa çatıb.

Oxu.Az "Report"a istinadən xəbər verir ki, onun nəşi Mehdiabad qəsəbə qəbiristanlığında dəfn edilib.

Dəfn mərasimində L.Bayramovanın doğmaları, rəsmi şəxslər, hüquq-mühafizə orqanlarının rəhbərləri, idarə, müəssisələrin əməkdaşları, ictimaiyyət nümayəndələri iştirak ediblər.

17:04

AZAL-a məxsus sərnişin təyyarəsinin Qazaxıstanın Aktau şəhəri yaxınlığında dekabrın 25-də qəzaya uğraması nəticəsində həlak olan 1963-cü il təvəllüdlü Leyla Bayramovanın nəşi Sumqayıt şəhərinə gətirilib.

Oxu.Az "Report"a istinadən xəbər verir ki, qəzada həlak olan L.Bayramovanın nəşi ailəsinə təhvil verilib.

Hazırda onunla vida mərasimi keçirilir.

Qeyd edək ki, dekabrın 25-də Bakı-Qroznı reysini yerinə yetirən "Embraer 190" tipli sərnişin təyyarəsinin Aktau şəhəri yaxınlığında qəzaya uğraması ilə əlaqədar Prezident İlham Əliyev dekabrın 26-sının Azərbaycanda matəm günü elan olunması barədə Sərəncam imzalayıb.