Ucarda iki avtomobilin toqquşması ilə nəticələnən yol-nəqliyyat hadisəsi baş verib.
Hadisə ilə bağlı Oxu.Az-a Daxil İşlər Nazirliyinin Baş Dövlət Yol Polisi İdarəsinin (BDYPİ) rəsmisi, polis polkovnik-leytenantı Mübariz Ağayev bildirib ki, qəza bu gün saat 12:50-də baş verib.
"Bakı-Qazax-Gürcüstan dövlət sərhəd avtomobil yolunun 249-cu kilometrliyində - Qaradağlı kənd ərazisindən keçən hissəsində Qüdrət Quliyevin idarə etdiyi "Hyundai" markalı avtomobil İlkin Rəsulovun idarə etdiyi "Ford" markalı avtomobil ilə toqquşub.
BDYPİ bir daha sürücülərə müraciət edərək onlardan hərəkət zamanı yolda müəyyən edilmiş sürət həddinə riayət etməyi, ara məsafəni sürət həddinə uyğun düzgün seçməyi, hərəkət zamanı tələsikliyə yol verməməyi xahiş edir", - deyə o qeyd edib.
Sürücülərin bildirdiyi ilkin ehtimallara görə, hadisənin baş verməsinə səbəb "Hyundai" markalı avtomobilin qarşısına sahibsiz itin çıxması olub. Bundan sonra ani tormozlanma edilib, nəticədə arxadan gələn "Ford" markalı avtomobil "Hyundai" markalı maşına çırpılıb.
Tibbi Ərazi Bölmələrini İdarəetmə Birliyindən Oxu.Az-a verilən məlumata görə, Ucar rayonunun Qaradağlı kənd ərazisindən keçən hissəsində baş vermiş yol-nəqliyyat hadisəsi nəticəsində 4 nəfər təcili və təxirəsalınmaz tibbi yardım vasitəsilə Ucar Rayon Mərkəzi Xəstəxanasının Təcili tibbi yardım bölməsinə hospitalizasiya olunub. İlkin tibbi yardım göstərildikdən sonra onlar ambulator müalicə üçün evə buraxılıblar.
Ucar Rayon Mərkəzi Xəstəxanasından Oxu.Az-a verilən məlumata görə, 1991-ci il təvəllüdlü Sumqayıt şəhər sakini Şərqiyyə Fikrət qızı Quliyeva yüngül dərəcəli bədən xəsarəti, 1972-ci il təvəllüdlü Ucar rayon sakini Pərvanə Məhəmməd qızı Rəsulova alın nahiyəsinin açıq yarası, 1993-cü il təvəllüdlü Ucar rayon sakini İlkin Əlişad oğlu Rəsulov döş qəfəsinin səthi travması, 1979-cu il təvəllüdlü Ucar rayon sakini Kəmalə Mirzəhüseyn qızı Rəsulova yüngül xəsarət ilə xəstəxanaya hospitalizasiya olunub, ilkin tibbi yardım göstərildikdən sonra evə buraxılıblar.
Aygün Mirakif
