Abşeron rayonu ərazisində bir vətəndaş üzləşdiyi qeyri-adi dələduzluq hadisəsi ilə bağlı polisə müraciət edib.
Oxu.Az-ın məlumatına görə, zərərçəkən bildirib ki, naməlum şəxs Xırdalan şəhəri ərazisində ona yaxınlaşaraq ehtiyacı olduğu üçün 1 manat yardım istəyib.
Ona pul verərkən zərərçəkənin cibində xeyli miqdarda maddi vəsait olduğunu görən həmin şəxs sosial eksperiment apardıqlarını iddia edib. O, veriliş üçün bir qədər də pul lazım olduğunu və çəkilişdən sonra geri qaytaracağını deyib. Bu yolla zərərçəkənin 1350 manatını alaraq ələ keçirib.
Abşeron Rayon Polis İdarəsi əməkdaşlarının keçirdikləri tədbirlərlə dələduzluq əməlini törətməkdə şübhəli bilinən 27 yaşlı Elvin Əvəz oğlu Mehdiyev müəyyən olunaraq saxlanılıb.
Araşdırma aparılır.
