Bakıda xəstə baxıcısı kimi çalışdığı evdən 20 min manat dəyərində qızıl-zinət əşyaları və nağd pul oğurlayan tibb bacısı hakim qarşısına çıxarılıb.
Oxu.Az "Qaynarinfo"ya istinadla xəbər verir ki, o, məhkəmədə cinayəti maddi sıxıntı və uzun illər etibar etdiyi qadının hədə-qorxusu nəticəsində törətdiyini iddia edib.
Məhkəmə araşdırması zamanı müəyyən olunub ki, təqsirləndirilən şəxs "Yeni Klinika"da kiçik tibb bacısı işləməklə yanaşı, əlavə gəlir əldə etmək üçün fərdi qaydada xəstə baxıcısı kimi də fəaliyyət göstərib. O, insult keçirmiş yaşlı kişiyə evdə qulluq göstərdiyi günlərdən birində ev sahibinə məxsus yataq otağındakı dolabdan külli miqdarda qızıl-zinət əşyaları və nağd pul götürüb.
İş materiallarına əsasən, oğurlanan əşyalar arasında kişi və qadın boyunbağıları, bilərziklər, üzüklər, sırğalar, kulonlar, uşaq qızıl-zinət əşyaları, "Versace" markalı qızıl üzük və 800 manat nağd pul olub. Oğurluq nəticəsində zərərçəkmişə ümumilikdə 20 min 227 manat maddi ziyan dəyib.
Məhkəmədə özünü ittiham üzrə qismən təqsirli bilən tibb bacısı bildirib ki, əvvəlcədən həmin evdən oğurluq etmək niyyəti olmayıb. Onun sözlərinə görə, illərlə tanıdığı qadın müxtəlif falçılara pul çatdırmaq adı ilə ondan davamlı şəkildə külli miqdarda pul alıb. O iddia edib ki, həmin qadın əvvəlcə anasına "cadu olunduğunu", daha sonra isə şəxsi həyatı ilə bağlı problemlərin həlli üçün falçılara müraciət etməyin vacibliyini deyərək ondan minlərlə manat alıb.
Təqsirləndirilən şəxs ifadəsində bildirib ki, bu səbəbdən banklardan kredit götürüb, borca düşüb və sonradan həmin qadın ona pul vermədiyi təqdirdə şəxsi yazışmalarını və tanış olduğu şəxslərlə bağlı məlumatları ailə üzvlərinə göndərəcəyi ilə hədə-qorxu gəlib. O, məhz bundan sonra xəstə baxıcısı işlədiyi evdə qiymətli əşyalar axtardığını və tapdığı qızılları həmin qadına verdiyini iddia edib.
Onun sözlərinə görə, qadın qızıl-zinət əşyalarını satacağını, əldə olunan vəsaitin bir hissəsini ona verəcəyini bildirib. Daha sonra isə qızılların cəmi 5 min manata satıldığını deyərək ona yalnız 1000 manat göndərib.
Zərərçəkmiş şəxs istintaqda bildirib ki, atasının müalicəsi üçün növbəli şəkildə evə gələn tibb bacılarından yalnız təqsirləndirilən şəxs hadisə baş verən gün evdə olub. Bir müddət sonra yataq otağındakı dolabdan çoxsaylı qızıl-zinət əşyalarının və nağd pulun yoxa çıxdığını aşkar edib. Aparılan araşdırmalar nəticəsində oğurluğun məhz xəstə baxıcısı tərəfindən törədildiyi müəyyənləşib.
Məhkəmə baxışı zamanı zərərçəkmiş şəxs təqsirləndirilən şəxsin ona dəymiş maddi ziyanı tam ödədiyini, artıq heç bir şikayət və tələbinin olmadığını bildirərək bu halın hökm çıxarılarkən nəzərə alınmasını xahiş edib. Məhkəmə təqsirləndirilən şəxsi Cinayət Məcəlləsinin 177.2.4-cü (xeyli miqdarda ziyan vurmaqla oğurluq) maddəsi ilə təqsirli bilərək ona 1 il 6 ay müddətinə azadlığın məhdudlaşdırılması cəzası təyin edib.
Təqsirləndirilən şəxsin istintaq dövründə həbsdə saxlanıldığı bir gün cəza müddətinə hesablanıb və onun üzərində qəti olaraq 1 il 5 ay 29 gün müddətinə azadlığın məhdudlaşdırılması cəzası saxlanılıb.
