Bu il Azərbaycan Milli Paralimpiya Komitəsinə (MPK) altı mənbədən ümumilikdə 2 291 046,03 manat vəsait daxil olub.
Oxu.Az-ın xəbərinə görə, bunlar Əmək və Əhalinin Sosial Müdafiəsi Nazirliyi (650 min), Gənclər və İdman Nazirliyi (64 409), Azərbaycan Respublikası Prezidentinin ehtiyat fondu (500 min), Azərbaycan Respublikasının dövlət büdcəsi (395 349), komitənin tərəfdaşları (359 091,94) və “IBSA Judo Grand Prix Baku 2019” yarışından (357 540,09) daxil olan vəsaitlərdir.
Qeyd olunan maliyyə vəsaitləri isə əsasən beynəlxalq yarışlarda iştirak, daxili yarışların təşkili, təlim-məşq toplantıları, aviabiletlərin, dərman vasitələrinin alınması, tədbirlərin təşkili, uşaq paralimpiya hərəkatının inkişafı, komitənin ofisinin saxlanma xərcləri və “Tokio 2020”yə ilkin hazırlıq istiqamətində xərclənib.
Belə ki, cüdo idman növünə 134 464 manat, atletikaya 281 953 manat, pauerliftinqə 105 934 manat, güllə atıcılığına 71 098 manat, üzgüçülüyə 86 172 manat, kamandan oxatmaya 66 148 manat, taekvondoya 27 157 manat, velosiped idmanına 7 212 manat, boççia idman növünə 19 980 manat, qılıncoynatmaya 6 143 manat, qış idman növlərinə 12 091 manat, əlil arabasında idman rəqsinə 16 223 manat, uşaq paralimpiya hərəkatına 78 407 manat xərclənib.
MPK həmçinin 2019-cu ildə aviabiletlər üçün 266 966.86, üzvlük haqqı üçün 7268.97, ofis icarə haqqı üçün 35 min, 7,5%-dək azaldılmış ofis xərcləri üçün 169 853,75, Tokio-2020 ilkin xərcləri üçün 20 761.05, gömrük xərcləri üçün 3237.88, viza rüsumu üçün 4083,81, lisenziya üçün 248,12, bank xidmət haqqı üçün 4473,68, komitə işçilərinin ezamiyyəti üçün 27 692.12, eləcə də DSMF və vergi ödənişləri üçün 37 746.64 AZN xərclənib.
2019-cu il ərzində paralimpiyaçılar beynəlxalq yarışlarda 17 qızıl, 23 gümüş və 25 bürünc olmaqla ümumilikdə 65 medal qazanıb. Bu müddətdə idmançılarımız 26 beynəlxalq yarışda, 21 təlim-məşq toplanışında və altı daxili turnirdə mübarizə aparıb.
İndiyədək “Tokio 2020”yə yeddi lisenziya qazanılıb. Bu lisenziyalar güllə atıcılığı, atletika, üzgüçülük və pauerliftinq idman növləri üzrədir. MPK “Tokio 2020” Yay Paralimpiya Oyunlarında Azərbaycanın yeddi idman növü üzrə 32 idmançı ilə təmsil olunacağını proqnozlaşdırır. Rio Paralimpiya Oyunlarında bu rəqəm 24 olub.
Növbəti ildən etibarən ölkəmizdə əlilliyi olan şəxslərin bacarıq yarışlarının keçirilməsi istiqamətində işlər həyata keçiriləcək. Fiziki məhdudiyyətli şəxslərin bacarıq yarışları beynəlxalq səviyyədə “Abilinpiks” olaraq tanınır. Bu istiqamətdə mütəmadi olaraq yarışlar keçirilir. Növbəti Abilimpiks yarışları Rusiyanın paytaxtı Moskvada baş tutacaq. Azərbaycan da bu ildən etibarən Abilimpiks hərəkatına qoşulmağı planlaşdırır.
2020-ci ildə VI Uşaq Paralimpiya Oyunlarının keçirilməsi nəzərdə tutulur. Əvvəlki illərdən fərqli olaraq, 2020-ci ildə Uşaq Paralimpiya Oyunlarının beynəlxalq müstəviyə çıxarılması nəzərdə tutulur. Bu istiqamətdə Rusiya, Moldova, Belarus, BƏƏ, Gürcüstan və Türkiyə ilə danışıqlar aparılır.
Səbuhi Musayev
