Avropa Liqasının I təsnifat mərhələsindən mübarizəyə qoşulacaq klub sayı yeddiyə çatıb

UEFA Avropa Liqasının I təsnifat mərhələsindən mübarizəyə qoşulacaq klubların sayı yeddiyə çatıb.

Oxu.Az xəbər verir ki, onlardan üçü səpələnmişlər, ikisi səpələnməmişlər səbətində yer alacaq, ikisinin səbəti qeyri-müəyyəndir.

Son olaraq Ukrayna nəhəngi "Şaxtyor", Rumıniya ÇFR-i, Macarıstan komandası "Paksi" və Sloveniyanın "Selye" komandası bu turnirdə iştirak hüququna yiyələniblər. Onlardan "Şaxtyor" və ÇFR Polşa klubu "Legiya" kimi, püşkatma zamanı səpələnmişlərdə olacaq.

Yəni, bu üç klub Azərbaycanı turnirdə təmsil edəcək komandanın potensial rəqibləridir.

Çünki ölkəmizdən Avropa Liqasına yollanma ehtimalı olan "Zirə" və "Sabah"ın reytinqi aşağıdır. Onlardan hansı turnirə vəsiqə qazansa, püşkdə zəiflərin sırasında yer alacaq.