Azərbaycan Premyer Liqası: "Zirə" "Səbail"i məğlub etdi

Azərbaycan Premyer Liqasının XVIII turunda "Zirə" komandası səfərdə "Səbail"i məğlub edib.

Oxu.Az xəbər verir ki, "ASCO Arena"da baş tutan görüş qonaqların 1:0 hesablı qələbəsi ilə yekunlaşıb.

"Zirə"nin heyətində 77-ci dəqiqədə Giorgi Papunaşvili fərqlənib.

Rəşad Sadıqovun baş məşqçisi olduğu komanda turnir cədvəlində 30 xalla dördüncüdür. Sonuncu - onuncu olan "Səbail"in isə 9 xalı var.

Qeyd edək ki, turun dünən keçirilən "Kəpəz" - "Sumqayıt" görüşündə qol vurulmayıb. XVIII tura sabah baş tutacaq "Şamaxı" - "Sabah" və "Qarabağ" - "Araz-Naxçıvan" oyunları ilə yekun vurulacaq.

17:55

Tovuz şəhər stadionunda keçirilən görüşdə şəhərin eyniadlı komandası "Neftçi"ni qəbul edib.

Oxu.Az xəbər verir ki, görüşə daha fəal başlayan "Neftçi" futbolçuları hesabı Filip Ozobiçin 45-ci dəqiqədə vurduğu qolla açıblar - 1:0. Amma, fasilədən sonra toparlanan meydan sahibləri bərabərlik qolunu vurublar. Aleks Souza 54-cü dəqiqədə müdafiə xəttində yaranan çaşqınlıqdan layiqincə yararlanıb - 1:1.

Qalan vaxtda komandalar çox çalışsalar da, hesab dəyişməyib.

Xatırladaq ki, aktivində 32 xalı olan "Turan Tovuz" üçüncü pillədə qərarlaşıb. "Neftçi" 17 xalla 7-cidir.

Qeyd edək ki, turun digər oyunlarında "Səbail" "Zirə"ni bu gün saat 18:30-da qəbul edəcək. "Şamaxı"ı "Sabah"la, "Qarabağ" isə "Araz-Naxçıvan"la dekabr ayının 22-də üz-üzə gələcək.

09:04

Bu gün Azərbaycan Premyer Liqasında XVIII turun ikinci oyun günündə "Turan Tovuz" "Neftçi"ni, "Səbail" isə "Zirə"ni qəbul edəcək.

Oxu.Az xəbər verir ki, Tovuz şəhər stadionunda keçiriləcək görüş saat 16:00-da, Bakıda, "ASCO Arena"da baş tutacaq qarşılaşma isə saat 18:30-da start götürəcək.

Xatırladaq ki, ilk oyun günündə "Kəpəz"lə "Sumqayıt" qarşılaşıblar. Oyun 0:0 hesablı heç-heçə ilə başa çatıb.

Qeyd edək ki, turun digər görüşləri dekabr ayının 22-də keçiriləcək. "Şamaxı" "Sabah"ı, "Qarabağ" isə "Araz-Naxçıvan"ı qəbul edəcək.