Azərbaycan Bakıda keçirilən Avropa Oyunlarında daha bir medal qazandı.
Oxu.Az xəbər verir ki, ilk qarşılaşmasında gürcü rəqibi İrakli Tkebuçavaya 2:0 hesabı ilə qalib gələn karateçimiz Niyazi Əliyev daha sonra fransalı rəqibi Stevan Da Kostaya (3:1), ispaniyalı Manuel Rosero Ruisə (2:) qalib gəlib.
Lakin yarımfinalda türkiyəli Burak Uyğura uduzan (1:4) Niyazi bürünc medal uğrunda qarşılaşmada Rikardo Gieglerə qalib gəlib (3:1) və fəxri kürsünün üçüncü pilləsində qərarlaşıb.
Qeyd edək ki, bu, Azərbaycan yığmasının üçüncü medalıdır. Belə ki, bundan əvvəl karateçi Firdovsi Fərzəliyev qızıl, İlahə Qasımova isə bürünc medal qazanmışdılar.
17:48
Azərbaycan millisi Bakı-2015 Birinci Avropa Oyunlarının ilk medalını qazanıb.
Oxu.Az Apasport.az-a istinadən xəbər verirm ki, buna qadın karateçimiz İlahə Qasımova nail olub.
55 kq çəki dərəcəsində kumite yarışında yarımfinala qədər inamla irəliləyən 22 yaşlı karateçi bu mərhələdə fransız Emili Toya məğlub olaraq, bürünc medal uğrunda mübarizə aparmalı olub.
Burda isə rəqib ispaniyalı Kristina Qarsiya Ferrer olub. Gərgin keçən oyunda Ferrer üzərində 5:2 hesablı qələbə qazanan İlahə Azərbaycanın Avropa Oyunlarında medal qazanan ilk idmançısı olub.
17:25
Karatenin Kumite növü üzrə keçirilən yarışlarda 60 kq çəkidə finala vəsiqə qazanan Firdovsi Fərzəliyev ardınca 75 kq çəkidə yığmamızın lideri Rafael Ağayev də finala adlayıb.
Oxu.Az xəbər verir ki, dünya və Avropa çempionumuz debüt görüşündə ukraynalı İlya Nikulinlə üz-üzə gəlib. 3:0 hesabı ilə qalib gələn titullu idmançımız ikinci qarşılaşmasında gözlənilmədən Erman Eltemura (Türkiyə) uduzub - 3:5. Buna baxmayaraq, qrupda son döyüşünü Latviyanı təmsil edən Ruslan Sadıqova qarşı keçirən Ağayev 3:1 hesabı ilə məğlub edərək, qrup səddini adlayıb.
Rafael yarımfinalda almaniyalı Noa Bitşlə qarşılaşıb. Döyüş həmyerlimizin 1:0 hesablı qələbəsi ilə başa çatıb. Ağayev qızıl medal uğrunda italiyalı Luici Busa ilə gücünü yoxlayacaq.
16:41
Azərbaycanlı karateçi Firdovsi Fərzəliyev Bakı-2015 Birinci Avropa Oyunları çərçivəsində final mərhələsinə keçib.
Oxu.Az-ın Trend-ə istinadən məlumatına görə, Fərzəliyev yarımfinal mərhələsində Moldova idmançısı Emil Pavlovu tatamidən kənara çıxarmaqla finala vəsiqə qazanıb.
Digər azərbaycanlı karateçi İlahə Qasımova isə Bakı-2015 Birinci Avropa Oyunları çərçivəsində final mərhələsinə adlaya bilməyib.
Yarımfinal mərhəsində İ.Qasımova Fransa idmançısı Emili Toya məğlub olub.
12:56
Kişilər arasında 60 kq çəki dərəcəsində kumite yarışında Firdovsi Fərzəliyev ispaniyalı Qomes Qarsiyaya 2-0 hesabı ilə qalib gəlib, daha sonra italiyalı Mareska Lukanı 2-4 hesabı ilə və Albaniya təmsilçisi Markeçi Halili 6-0 hesabı ilə məğlub edib.
Oxu.Az apasport.az-a istinadən xəbər verir ki, 67 kq çəki dərəcəsində kumite yarışında Niyazi Əliyev Gürcüstan təmsilçisi Tkebuçava İrakliyə 2-0 hesabı ilə, Fransa təmsilçisi Da Kosta Stevenə 3-1 hesabı ilə, İspaniya təmsilçisi Rasero Ruisi 2-0 hesabı ilə qalib gəlib.
Digər görüşdə isə kişilər arasında 75 kq çəki dərəcəsində kumite yarışında Rafael Ağayev Ukrayna təmsilçisi İlya Nikulini 3-0 hesabı ilə məğlub edib.
Qadınlar arasında 60 kq çəki dərəcəsində mübarizə aparan Nuranə Əliyeva avstriyalı Bettina Planklanı 0:1 hesab ilə qələbə qazanıb.Türkiyəli Serap Özçelikə 0:6, xorvatiyalı Monika Beruleç 0:3 hesabı ilə məğlub olan Əliyeva qrupda sonuncu olub və vaxtından əvvəl Oyunlarla vidalaşıb.
Qadınlar arasında 55 kq çəki dərəcəsində mübarizə aparan İlahə Qasımova birinci döyüşünü Cenni Varlinqə (Lüksemburq) qarşı keçirib. Döyüş 4:0 hesabı ilə təmsilçimizin xeyrinə başa çatıb.
O, ikinci görüşündə də uğurlu seriyanı davam etdirib. Türkiyəli Tuba Yakanla qarşılaşan həmyerlimiz bu dəfə 1:0 hesablı qələbəyə sevinib.
Bu qələbə sayəsində yarımfinala vəsiqəni təmin edən İlahə son görüşünü xorvatiyalı Yelena Kovaçeviçə qarşı keçirib. Rəqib 1:0 hesabı ilə qalib gəldiyindən, Qasımova qrup ikincisi kimi mərhələ adlayıb.
61 kq çəki dərəcəsində mübarizə aparan Fəridə Abıyevanın Avropa Oyunlarında debütü slovakiyalı İnqrida Suşankova görüşə təsadüf edəcək. 20 yaşlı həmyerlimiz daha sonra Ana Lenard (Xorvatiya) və Merve Çobanla (Türkiyə) münasibətinə aydınlıq gətirəcək.
10:55
Bu gün Bakı 2015 Avropa Oyunlarında karateçilər mübarizəyə başlayıblar.
Oxu.Az xəbər verir ki, “Crystall Hall”da təşkil olunan ilk yarış günündə 6 dəst medal oynanılacaq.
Karatenin kumite növü üzrə keçirilən yarışda Azərbaycan bütün çəki kateqoriyalarında təmsil olunur.
www.oxu.az
