Sabah Macarıstanın paytaxtı Budapeştdə güləş üzrə ilin son reytinq turnirinə start veriləcək.
Bu barədə Oxu.Az-a Azərbaycan Güləş Federasiyasından məlumat verilib.
Mövsümün 4-cü reytinqi turnirində ölkəni 21 güləşçi təmsil edəcək.
İyulun 19-dək davam edəcək turnirə sərbəst güləşçilər start verəcəklər. Baş məşqçi Xetaq Qazyumov, böyük məşqçi Cəbrayıl Həsənov, məşqçilər Arif Abdullayev, Taymuraz Kokoyev və Şərif Şərifovun rəhbərliyi altında İslam Bazarqanov (57 kq), Nürəddin Novruzov (61 kq), Rəşid Babazadə (65 kq), Kənan Heybətov (70 kq), Turan Bayramov (74 kq), Cəbrayıl Hacıyev (79 kq), Arseniy Djioyev (86 kq), Ali Tsokayev (92 kq), Osman Nurmaqomedov (97 kq) və Giorgi Meşvildişvili (125 kq) məsul yarışda güclərini sınayacaqlar.
Daha sonra estafet qadın güləşçilərə keçəcək. Məşqçi Həsrət Məmmədyarovun rəhbərliyi altında Nərgiz Səmədova, Əsmər Cankurtaran (hər ikisi (53 kq), Gültəkin Şirinova (55 kq), Jalə Əliyeva (57 kq), Birgül Soltanova (65 kq) və Nigar Mirzazadə (68 kq) uğur qazanmağa çalışacaqlar.
Yunan-Roma güləşçilərinin mübarizəsində isə ölkəmizi Elmir Əliyev (60 kq), Murad Məmmədov, Sakit Quliyev (hər ikisi 63 kq), Məhəmməd Şükürzadə (67 kq) və Arif Niftullayev (97 kq) təmsil edəcəklər. Komandanın məşqçilər korpusuna böyük məşqçi Nurəddin Rəcəbov və məşqçi Rövşən Bayramov daxildirlər.
İlkin görüşlər hər gün Bakı vaxtı ilə saat 12:30-da, medallar uğrunda qarşılaşmalar isə saat 20:00-da başlayacaq.
Reytinq turnirində I-S kateqoriyalı hakim Asif Şirəliyev ədaləti qoruyacaq.
