Azərbaycanın güləş millisi Qazaxıstanın paytaxtı Astanada keçirilən dünya çempionatında 2 qızıl, 2 gümüş və 2 bürünc medal qazanıb.
Oxu.Az xəbər verir ki, bu barədə Azərbaycan Güləş Federasiyası məlumat yayıb.
Bildirilib ki, Əli Tsokayev (92 kq) debüt etdiyi dünya çempionatını bürünc medalla başa vurub.
O, iranlı dünya mükafatçısı Əmirhüseyn Firuzpurbandbeyə 6:0 hesabı ilə qalib gələrək fəxri kürsünün üçüncü pilləsinə yüksəlib.
Bundan başqa, İslam Bazarqanov (57 kq) bürünc medal uğrunda görüşdə rusiyalı Abubakar Mutaliyevə 2:6 hesabı ilə məğlub olub.
Turan Bayramov (74 kq) təsəlliverici görüşlərdə qələbə qazanaraq bürünc medal uğrunda qarşılaşmaya vəsiqə əldə edib.
Güləşçi əvvəlcə kosovolu Eqzon Xonini 7:0 hesabı ilə, daha sonra isə tacikistanlı Viktor Rassadini xalların keyfiyyətinə görə (2:2) məğlub edib. Lakin bürünc medal uğrunda görüşdə yaponiyalı Yoşinosuke Aoyagiyə 0:11 hesabı ilə uduzub.
Cəbrayıl Hacıyev (79 kq) isə üçüncü yer uğrunda qarşılaşmada Belarusun olimpiya mükafatçısı və Avropa çempionu Maqamedxabib Kadimaqomedova 0:3 hesabı ilə məğlub olub.
