Azərbaycan yığma komandasının sabiq üzvü Mert Çelik mərc oyunları ilə əlaqədar futboldan uzaqlaşdırılmasını şərh edib.
Oxu.Az xəbər verir ki, "Sivasspor"un futbolçusu sosial şəbəkə hesabında açıqlama verərək dərin narahatlıq keçirdiyini deyib.
"Bir müddətdir adımın hallandığı və etibarıma zərər verən bu mövzu səbəbindən dərin narahatlıq içindəyəm. Kiçik yaşda internet saytında qeydiyyatdan keçməyin illər sonra cəzasını yaşayıram. Ailəmə, yaxınlarıma və bütün sivaslılara yaşatdığım bu vəziyyət qarşısındakı xəcalətimi sözlə ifadə etmək çətindir. Yenə də ən yüngül cəza ilə bu prosesi geridə qoymaq mənə müəyyən mənada təsəlli verir" , - deyə o paylaşımında qeyd edib.
Qeyd edək ki, 25 yaşlı müdafiəçi 45 gün müddətinə futboldan uzaqlaşdırılıb.
Xatırladaq ki, Çelik Azərbaycan millisinin heyətində yalnız bir oyun keçirib. O, bu il Belarusla keçirilən yoxlama matçında iştirak edib. Futbolçu daha əvvəl Azərbaycanın U-21 yığmasında, eləcə də "Neftçi" və "Səbail" klublarında da çıxış edib.
