Misli Premyer Liqasının VII turu penaltilərlə zəngin olub.
Oxu.Az xəbər verir ki, bu barədə Peşəkar Futbol Liqası (PFL) məlumat yayıb.
Bildirilib ki, altı oyunda beş dəfə 11 metrlik cərimə zərbəsi təyin olunub. Ruan Renato ("Zirə") "Neftçi"nin, Coy-Lens Mikels ("Sabah") "Karvan-Yevlax"ın, Rikardo Apolinario ("Şamaxı") "Qəbələ"nin qapısına yol tapıblar. Dioqo Almeyda ("İmişli") "Araz-Naxçıvan"a, Aleksandr Ramalinqom ("Sumqayıt") "Turan Tovuz"a qarşı matçda imkanları qaçırıblar.
Bu, penalti sayında mövsümün rekordudur. Premyer Liqada daha çox belə zərbələrin təyin edilməsi sonuncu dəfə ötən mövsümün XI turunda təsadüf olunub. Həmin vaxt 5 oyunun hamısında, ümumilikdə altı dəfə 11 metrlik cərimə zərbəsi təyin edilmişdi.
2024-cü il oktyabrın 25-27-dəki turda bu zərbələrdən üçü qolla nəticələnib, üçü qeyri-dəqiq alınmışdı. Toral Bayramov ("Qarabağ") "Şamaxı", Felipe Santos ("Araz-Naxçıvan") "Zirə" ilə matçda dəqiq olmuşdularsa, Cesse Sekidika ("Sabah") "Neftçi", Fərid Nəbiyev ("Səbail") "Sumqayıt"la dueldə şanslarını qaçırıblar. İki penalti təyin edilən görüşdə isə Luis Paçu ("Kəpəz") qola sevinibsə, Kristian da Silva ("Turan Tovuz") qeyri-dəqiq olub.
