Azərbaycan Premyer Liqasının son turun oyunlarını 24 300 tamaşaçı izləyib.
Oxu.Az Peşəkar Futbol Liqasının rəsmi saytına istinadla xəbər verir ki, 36-cı turda mövsümün mütləq rekordu qeydə alınıb. Bunadək ən yüksək göstərici 32-ci tura təsadüf edib - 13 800 izləyici. Ümumilikdə isə çempionatın 180 matçında 276 487 tamaşaçı olub. Orta hesabla hər oyunu 1536 azarkeş izləyib.
32-ci turun "Sumqayıt" - "Qarabağ" və 36-cı turun "Sumqayıt" - "Qəbələ" görüşlərini rekord sayda - 9300 nəfər izləyib. 21-ci turun "Sumqayıt" - "Neftçi" qarşılaşmasında bu rəqəm 8100-ə bərabər olub.
Qeyd edək ki, ən çox tamaşaçı toplayan üç oyuna "Sumqayıt" ev sahibliyi etsə də, mövsümün ən çox tərəfdar toplayan komandası "Turan Tovuz" olub - bunun da səbəbi gənclik şəhərini təmsil edən komandanın ev meydanının mövsümün sonuna yaxın istifadəyə verilməsi olub. Bu göstəricidə "Neftçi" üçüncüdür.