Azərbaycan Güləş Federasiyasının sözçüsü: "Məhəmməd Abdullazadə millimizin üzvü deyil"

"Azərbaycan millisinin üzvü olan güləşçilərimiz mütəmadi olaraq məlumatlandırıldıqları üçün bu cür hallar baş vermir".

Bunu Oxu.Az-a açıqlamasında Azərbaycan Güləş Federasiyasının mətbuat katibi Sərxan Musalı bildirib.

"Milli komandada çıxış edən güləşçilər mütəmadi olaraq dopinq mövzusu ilə əlaqədar məlumatlandırılırlar. Hətta dərmanları belə həkim nəzarəti ilə qəbul edirlər. Son illərdə güləşçilərimizdə dopinq aşkarlanması minimum həddə çatıb. Millimizdə iştirak edən güləşçilərdən ildə bir dəfə və ya iki ildə bir dəfə dopinq aşkarlanır. Bu hallar isə, idmançıların fərdi səhvi səbəbindən baş verir.

Yerli mediada adı hallanan və 48 ay müddətinə uzaqlaşdırılan güləşçi Azərbaycan millisində çıxış etmir. Gənclər arasında Azərbaycan çempionatında güləşib. Ən yaxşı halda Azərbaycan çempionatında üçüncü yeri tutub. Hər çempionatdan sonra medal qazanan idmançılardan test nümunələri götürülür. Məhəmmədin testi müsbət çıxıb deyə diskvalifikasiya edilib. Lakin bu, 2024-cü il yanvarın sonu, fevralın əvvəllərində keçirilən Azərbaycan çempionatından sonra baş verib. Güləşçi Azərbaycan millisində olmadığı üçün, həkimlərimizin nəzarətində olmayıb. Qəbul etdiyi dərmanın tərkibində dopinq olub və bu da cəzalandırılmasına səbəb olub", - deyə S.Musalı bildirib.

Qeyd edək ki, Məhəmməd Abdullazadə nümunəsində qadağan edilmiş maddə və ya onun metabolitləri, markerlərinin mövcudluğu səbəbindən dörd il müddətinə diskvalifikasiya olunub. Sanksiyanın qüvvəyə minmə tarixi ötən il martın 15-i göstərilib. Cəzanın müddəti 2028-ci il martın 15-də bitəcək.

09:20

Azərbaycan güləşçisi Məhəmməd Abdullazadə antidopinq qaydalarını pozduğuna görə 48 aylıq diskvalifikasiya edilib.

Oxu.Az Azərbaycan Milli Antidopinq Agentliyinə (AMADA) istinadən xəbər verir ki, buna idmançının analizində qadağan edilmiş maddə və ya onun metabolitləri və ya markerlərinin mövcudluğu səbəb olub.

Güləşçi qadağan edilmiş maddə və ya üsuldan istifadə, yaxud istifadə cəhdinə görə cəzalanıb. Onun nümunəsində "S4 Hormon və Metabolik Modulyatorlar - Meldonium" aşkarlanıb.

M.Abdullazadənin sanksiyasının qüvvəyə minmə tarixi ötən il martın 15-i göstərilib. Cəzanın müddəti 2028-ci il martın 15-də bitəcək.