"Komandanın oyunundan məmnunam, xarakter nümayiş etdirdik, çünki burada hava şəraiti ağırdır. "Qarabağ" olduqca güclü rəqibdir. Özümə gəldikdə isə, yaxşı oynadığımı düşünürəm, lakin bundan daha yaxşısını da edə bilərəm".
Oxu.Az blitz.bg saytına istinadən xəbər verir ki, bunu "ÇSKA Sofiya" klubunun müdafiəçisi Teodor İvanov "Qarabağ"la matçdan sonra deyib.
"İkinci oyunu ölüm-dirim mübarizəsi kimi qəbul edirəm. Qalib gələn tərəf yoluna davam edəcək.
"Qarabağ"ın hücumçuları çox fərqlidir. Klassik mərkəz hücumçuları yoxdur. Hamısı çox sürətli və çevikdir. Xüsusilə sonradan meydana daxil olan sol cinah oyunçusu (yamaykalı yeni transfer Renaldo Sefas nəzərdə tutulur - red.) məni çox təəccübləndirdi, o, həqiqətən yaxşı futbolçudur", - deyə İvanov bildirib.
Qeyd edək ki, UEFA Avropa Liqasının ikinci təsnifat mərhələsinin ilk oyununda "Qarabağ" Bakıda "ÇSKA Sofiya" ilə heç-heçə edib (0:0). Təkrar oyun iyulun 30-da Bolqarıstanda baş tutacaq.
