Azərbaycan Şahmat Federasiyasının prezidenti Elman Rüstəmov jurnalistlərə açıqlamasında Bakıda keçirilən şahmat üzrə Qran-Pri turnirindən danışıb.
Oxu.Az xəbər verir ki, Elman Rüstəmovun sözlərinə görə, Qran-Pri şahmat sevərlər üçün əsl bayramdır.
“Bakıda 12 güclü şahmatçı mübarizə aparır. Biz onlar üçün hər cür şərait yaratmışıq. Sözsüz ki, çox istərdik bizim şahmatçılar qələbə qazansın. Həm Teymura, həm Şəhriyara ümid böyükdür. FİDE prezidenti Kirsan İlyumjinovla söhbət zamanı Azərbaycan prezidenti İlham Əliyevin şahmatın inkişafına dair imzaladığı Dövlət Proqramı müzakirə edildi. Proqramın icrası həyata keçirildi. Kütləvilik, şahmatın daha da populyarlaşması üçün işlər görüldü. Millimiz bu illərdə iki dəfə Avropa Çempionu oldu, SOCAR klubu sayəsində iki dəfə Avropa Kubokunu qazandıq. Dövlət Proqramının daha 5 il müddətinə artırılmasına zərurət yaranıb. Bəzi məsələlər var ki, onları reallaşdırmaq lazımdır. Şahmatın daha yüksək səviyyədə təqdim olunması üçün bu, vacibdir. İnfrastruktur artıq yaradılıb. Ölkədə 65 uşaq şahmat məktəbi fəaliyyət göstərir. Eyni zamanda FİDE rəhbərliyini əmin etdik ki, Azərbaycan gələn Dünya Kuboku, 2016-cı ildə isə şahmat olimpiadasını yüksək səviyyədə keçirəcək”.
Bakıda keçirilən şahmat üzrə Qran-Pri turnirinin Təşkilat Komitəsi Azərbaycan şahmatının son illərdəki uğurlarına həsr edilən video süjet hazırlayıb. Həmin süjeti sizə təqdim edirik.
