Beynəlxalq Futbol Federasiyaları Assosiasiyasının (FIFA) prezidenti Canni İnfantino dünya kubokunu rəmzi olaraq Kanadanın Baş naziri Mark Karniyə təqdim edib.
Oxu.Az "TSN" telekanalına istinadən xəbər verir ki, bu, dünya çempionatı ərəfəsində kubokun nümayişi çərçivəsində baş tutub.
Qızıl kubokun rəmzi təqdimat mərasimi Ottava şəhərində keçirilib. Tədbir zamanı M.Karni son illər ölkəsində futbolun populyarlığının inanılmaz dərəcədə artdığını vurğulayıb. Məhz bu inkişaf həm kişi, həm də qadın milli komandalarına beynəlxalq arenada böyük uğurlar qazandırmağa imkan yaradıb.
Belə ki, qadınlardan ibarət yığma 2021-ci ildə Tokio Olimpiya Oyunlarında qızıl medal qazanıb, kişi komandası isə dörd il əvvəl 1986-cı ildən bəri ilk dəfə olaraq dünya birinciliyinə vəsiqə əldə edib.
Xatırladaq ki, həyəcanla gözlənilən 2026-cı il dünya çempionatı 11 iyun-19 iyul tarixlərində ABŞ, Kanada və Meksikada keçiriləcək. Qrup mərhələsində Kanada yığması B qrupunda Bosniya və Herseqovina, Qətər və İsveçrə komandaları ilə gücünü sınayacaq.
