Azərbaycan Qran-prisi çərçivəsində "Formula-1" kateqoriyasında sıralama turu başa çatıb.
Oxu.Az xəbər verir ki, ən yaxşı nəticəni "Red Bull" komandasının pilotu Maks Ferstappen göstərib. İkinci yerdə "Williams" komandasının üzvü Karlos Sayns, üçüncü yerdə isə "Racing bulls" komandasının pilotu Liam Louson qərarlaşıblar.
"Formula-1" sıralama turuna daha bir pilot erkən vida edib.
Oxu.Az xəbər verir ki, yarışın üçüncü hissəsində "McLaren" komandasının üzvü Oskar Piastri bolidini maneə çırpıb. Bu səbəbdən o, sıralama turunu yarımçıq başa vurub.
"Formula-1" sıralama turunda daha bir qəza baş verib.
Oxu.Az xəbər verir ki, "Ferrari" komandasının pilotu Şarl Lekler idarəetməni itirərək, bolidi maneəyə çırpıb və yarışı yarımçıq tərk edib.
"Formula-1" kateqoriyasında sıralama turuna daha bir pilot erkən vida edib.
Oxu.Az xəbər verir ki, yarışın ikinci hissəsində "Haas" komandasının üzvü Oliver Bermanın bolidində nasazlıq baş verib. Bu səbəbdən o, sıralama turunu yarımçıq başa vurub.
"Formula-1" kateqoriyasında sıralama turunda qəza baş verib.
Oxu.Az xəbər verir ki, "Alpine" komandasının pilotu Franko Kolapinto idarəetməni itirib, nəticədə onun bolidi maneəyə çırpılıb və bu səbəbdən yarışda qırmızı bayraq tətbiq olunub.
Qeyd edək ki, hazırda sıralama turunun birinci hissəsi bitib.
"Formula-1" kateqoriyasında sıralama turunda "Williams" komandasının pilotu Aleksandr Albon döngəyə düzgün girə bilməyib.
Oxu.Az xəbər verir ki, nəticədə bolidin sol ön təkəri zədə görüb və pilot yarışı yarımçıq saxlayıb.
Bu səbəbdən öncə qırmızı bayraq tətbiq olunsa da, hazırda sıralama turu öz axarı ilə davam edir.
Azərbaycan Qran-prisi çərçivəsində "Formula-1" kateqoriyasında sıralama turu başladı.
Oxu.Az xəbər verir ki, komandaların sürücüləri gərgin mübarizədə sabah keçiriləcək əsas yarışdakı düzülüşü formalaşdıracaqlar.
Daha çox foto burada: PhotoStock.az
"Formula-1" kateqoriyasında üçüncü, sonuncu sərbəst yürüş başa çatdı.
Oxu.Az xəbər verir ki, ən yaxşı nəticəni "McLaren" komandasının üzvü Lando Norris göstərib.
Onun ardınca "Red Bull" komandasının pilotu Maks Ferstappen və "McLaren" komandasının üzvü Oskar Piastri gəlirlər.
Daha çox foto burada: PhotoStock.az
"Formula-1" kateqoriyasında üçüncü, sonuncu sərbəst yürüş başladı.
Oxu.Az xəbər verir ki, bundan öncəki iki sessiyada olduğu kimi, yürüş 1 saat davam edəcək.
Daha sonra, saat 16:00-da sıralama turunun başlanacağı gözlənilir. Beləliklə, bazar günü keçiriləcək əsas yarışda komandaların düzülüşü müəyyən olunacaq.
Fərid Novruzov
