ABŞ, Kanada və Meksikanın birgə ev sahibliyi edəcəyi 2026-cı il futbol üzrə dünya çempionatı turnir tarixinin ən genişmiqyaslı idman hadisəsi olmağa hazırlaşır. Bu möhtəşəm turnirin final mərhələsində ilk dəfə olaraq öyrəşdiyimiz 32 deyil, tam 48 milli komanda mübarizə aparacaq.
Oxu.Az RBK-ya istinadən xəbər verir ki, 2026-cı ilin mundialı təkcə komanda sayı ilə deyil, digər bir çox tarixi rekordların yenilənməsi ilə də yadda qala bilər.
2026-cı il dünya çempionatında qırılacaq ehtimal edilən rekordlar:
- ən böyük rekord oyunların sayı ilə bağlı olacaq. Əgər 1998-2022-ci illər aralığındakı dünya çempionatlarında 64 matç keçirilirdisə, 2026-cı ildə komandalar meydanda 104 dəfə üz-üzə gələcəklər. Bu artım ümumi vurulan qol sayında yeni rekordun qeydə alınma ehtimalını da yüksəldir. Xatırladaq ki, hazırkı rekord göstərici 1998-ci və 2014-cü il turnirlərində qeydə alınan 172 qoldur.
- iştirakçıların sayı da rekord səviyyəyə çatıb. Tarixdə ilk dəfə çempionluq titulu uğrunda 48 milli komanda mübarizə aparır. Buna uyğun olaraq, dünya birinciliyində çıxış etmək şansı qazanacaq futbolçuların sayı da xeyli artacaq.
- dünya çempionatı ilk dəfə eyni anda üç fərqli ölkənin - ABŞ, Kanada və Meksikanın stadionlarında baş tutur. Bundan əlavə, Meksika dünya çempionatı matçlarına üçüncü dəfə ev sahibliyi edən ilk ölkə kimi tarixə düşüb.
- Lionel Messi və Kriştianu Ronaldu altı dünya çempionatında iştirak edən ilk futbolçular ola bilərlər. Hazırkı rekord beş iştirakdan ibarətdir və Messi ilə Ronaldu da daxil olmaqla, ümumilikdə altı oyunçuya məxsusdur.
- Argentina yığmasının lideri dünya çempionatlarında keçirdiyi oyun sayına görə öz şəxsi rekordunu yeniləyəcək. Hazırda Messi 26 oyunla bu sahədə mütləq rekordçudur.
- Messi və Mbappe dünya çempionatlarında vurulan qolların sayına görə Miroslav Klozenin rekordunu qıra bilərlər. Hazırda almaniyalı hücumçunun hesabında 16, argentinalı ulduzun aktivində 13, fransız oyunçuda isə 12 qol var.
- Messinin DÇ-dəki qələbə sayına görə də Klozenin rekordunu qırmaq şansı var. Almaniya təmsilçisinin 17, argentinalı oyunçunun isə 16 qələbəsi mövcuddur.
- 18 yaşlı Lamin Yamal dünya çempionatının ən yaxşı oyunçusu mükafatını qazanan ən gənc futbolçu kimi tarixə düşə bilər. Hazırda bu rekord 1986-cı ilin mundialında 25 yaşında ikən "Qızıl top"u əldə edən Dieqo Maradonaya məxsusdur.
