İngiltərənin "Mançester Yunayted" futbol klubu Ceydon Sanço, Kazemiro və Tayrell Malasiyanın gedişini elan edib.
Oxu.Az xəbər verir ki, bu barədə klubun mətbuat xidməti məlumat yayıb.
Futbolçular müqavilə müddətlərinin başa çatması ilə əlaqədar klubu tərk ediblər.
Hazırda 34 yaşlı Kazemiro "Mançester Yunayted"ə 2022-ci ilin yayında transfer olunub və komandanın heyətində Liqa Kubokunu və İngiltərə Kubokunu qazanıb. Buna qədər braziliyalı yarımmüdafiəçi ölkəsinin "San-Paulu", həmçinin Portuqaliya "Portu"su və İspaniya "Real"ında çıxış edib. Madrid təmsilçisi ilə o, beş dəfə Çempionlar Liqası Kubokunu başı üzərinə qaldırıb. Həmçinin Madrid klubu ilə yarımmüdafiəçi üç dəfə İspaniya çempionatında və Superkubokunda, UEFA Superkubokunda və klublararası dünya çempionatında qalib gəlib, bir dəfə ölkə kubokunu qazanıb. Futbolçu Braziliya yığması ilə 2019-cu ildə Amerika Kubokunun da qalibi adını əldə edib.
26 yaşlı Ceydon Sanço isə 2021-ci ildə 85 milyon avro qarşılığında "Mançester Yunayted"ə qoşulub. Müqavilə müddətində o, üç fərqli klubu - Almaniyanın Dortmund "Borussiya"sını, həmçinin İngiltərənin "Çelsi" (London) və "Aston Villa" (Birmingem) komandalarını təmsil edib. Sanço Mançester təmsilçisinin formasını geyindiyi 83 qarşılaşmada 12 dəfə fərqlənib və 6 qol ötürməsinin müəllifi olub.
Tayrell Malasiyanın da 26 yaşı var. 2022-ci ildə mançesterlilərlə razılığa gələn oyunçu bu klubla İngiltərə Liqa Kubokuna sahib çıxıb. 2025-ci ildə icarə qaydaları çərçivəsində Niderlandın PSV komandasına keçən idmançı orada ölkə çempionluğu sevincini yaşayıb.
