Argentinalı futbolçu Mauro İkardi 11 yaşlı qızına qarşı fiziki zorakılıq göstərməkdə ittiham olunur. Hadisə ilə bağlı polis və təcili tibbi yardım əməkdaşları onun yaşadığı ünvana gediblər.
Oxu.Az xəbər verir ki, bu barədə Argentinanın "Infobae" nəşri məlumat yayıb.
Məlumata görə, hadisə noyabrın 6-da İkardinin Nordeltadakı evində baş verib. Futbolçunun keçmiş həyat yoldaşı Vanda Nara iddia edib ki, qızı atasının onu danladığını, vurduğunu və otağa kilidlədiyini bildirib. Telefonu əlindən alındığı üçün anası ilə kompüter vasitəsilə "qorxuram" məzmunlu mesaj göndərərək əlaqə saxlayıb.
Bundan sonra Nara hadisə yerinə yollanıb və polisə müraciət edib.
İlkin məlumatlara əsasən, İkardi polislərlə söhbətdən imtina edib. Qızın tibbi müayinəsi aparılıb, onun ciddi xəsarət almadığı bildirilib.
Hadisə ilə bağlı Tigre Şəhər Prokurorluğunda araşdırma başlanıb. Məhkəmə isə İkardinin qızına 45 gün ərzində yaxınlaşmasını və onunla hər hansı vasitə ilə əlaqə saxlamasını qadağan edib.
Noyabrın 12-də futbolçu prokurorluqda ifadə verərək qızına əl qaldırmadığını bildirib. O, hadisə günü baş verənləri öz versiyası ilə izah edib, video və yazışmaları sübut kimi təqdim edib. İkardi, həmçinin hər iki qızının xüsusi qaydada dindirilməsini istəyib.
