Səkkizqat "Qızıl top" mükafatının sahibi, argentinalı futbolçu Lionel Messi idmanın inkişafına görə "Asturiya şahzadəsi" mükafatı ilə təltif edilib.
Oxu.Az xəbər verir, bu barədə mükafat fondunun saytında bildirilib.
Məlumata əsasən, mükafat "İnter Mayami" futbol klubunun ulduzuna idman karyerasındakı görkəmli nailiyyətlərinə, eləcə də Messi Fondu vasitəsilə aztəminatlı ailələrdən olan uşaqların təhsilə və tibbi xidmətlərə çıxışının genişləndirilməsinə yönəlmiş xeyriyyəçilik fəaliyyətinə, həmçinin UNICEF-in xoşməramlı səfiri roluna görə verilib.
Qeyd edək ki, mükafat qeyri-rəsmi olaraq "İspaniyanın Nobel mükafatı" adlandırılır.
"Asturiya şahzadəsi" mükafatı 1980-ci ildən təqdim olunur. 2025-ci ildə idman kateqoriyasında mükafatı amerikalı tennisçi Serena Uilyams alıb. Əvvəllər mükafata ispaniyalı futbolçular İker Kasilyas və Xavi, eləcə də müvafiq olaraq 2002 və 2010-cu illərdə dünya çempionatlarındakı qələbələrdən sonra Braziliya və İspaniya yığmaları layiq görülmüşdü.
