"Neftçi" doqquz il sonra ilkə imza atıb

"Neftçi" Azərbaycan Premyer Liqasında doqquz ildən sonra ilkə imza atıb.

Oxu.Az Peşəkar Futbol Liqasının məlumatına istinadla xəbər verir ki, Roman Qriqorçukun yetirmələri öncə "Turan Tovuz" (0:0), ardınca "Səbail"lə (1:1) oyunlarda heç-heçə edib. Eyni komandanın startdakı iki turda heç-heçə etməsi isə son doqquz mövsümdə ilk dəfə qeydə alınıb.

Sonuncu belə hadisə 2015/16 mövsümündə yaşanıb. Həmin vaxt iki komanda - "Sumqayıt" və "Kəpəz" - startda sülhləri sıralayıb.

Ümumilikdə isə ölkə çempionatları tarixində 11-ci belə seriya qeydə alınıb. "Neftçi" tarixində ilk dəfə mövsümə heç-heçələrlə başlayıb.

"Bakı" (2011/12, 2012/13) və "Kəpəz" (2010/11, 2015/16) hərəyə iki dəfə belə starta imza atıb. Bakı "İnşaatçı"sı 1993/94, "Turan" 1996/97, AZAL 2008/09, "Simurq" 2012/13, "Xəzər Lənkəran" 2013/14, "Sumqayıt" 2015/16 mövsümündə sülhsevərlik göstərib.