"Neftçi"nin baş məşqçisi məğlubiyyəti şərh etdi

"Finala yüksələcəyimizlə bağlı inamımız davam edir".

Oxu.Az xəbər verir ki, bunu "Neftçi"nin baş məşqçisi Samir Abasov "Sabah"a qarşı Azərbaycan Kubokunun yarımfinal mərhələsinin ilk oyunundan sonra mətbuat konfransında deyib.

O, məğlub olduqları oyunu şərh edib:

"Finala yüksələcəyimizlə bağlı inamımız davam edir. Azərbaycan Kubokunda oyunlar 120 dəqiqəyə qədər uzana bilir. Ona görə, cütün taleyi növbəti matçda həll olunacaq. Cavab görüşündə qələbədən başqa yolumuz yoxdur. Futbolçulara inamımız davam edir. Lakin bəzi şeyləri dəyişməliyik. Bu gün birə-bir müzarizələrdə rəqibə uduzduq".

Qeyd edək ki, ölkə kubokunun yarımfinal mərhələsinin ilk matçında "Neftçi" doğma meydanda "Sabah"a məğlub olub - 1:2. Tərəflər arasında cavab görüşü aprelin 23-də reallaşacaq.

Anar Həsənov