Braziliya milli komandasının baş məşqçisi Karlo Ançelotti 2026-cı il dünya çempionatının qrup mərhələsinin son turunda Şotlandiya ilə keçiriləcək matçın heyətinə Neymarın da daxil ediləcəyini rəsmən təsdiqləyib.
Oxu.Az "Çempionat" nəşrinə istinadən xəbər verir ki, Haiti üzərində qazanılan inamlı qələbədən (3:0) sonra italiyalı mütəxəssis hücumçunun hazırkı durumu barədə ictimaiyyətə məlumat verib.
"Neymar sabah fərdi qaydada məşq edəcək, bazar günü isə ümumi qrupun məşqlərinə qoşulacaq. Məhz bundan sonra o, Şotlandiya ilə oyuna dəvət alacaq", - deyə Ançelotti bildirib.
Qeyd edək ki, sağlamlığında yaranmış problemlər səbəbindən Neymar cari dünya çempionatında hələlik heç bir matçda meydana çıxmayıb, lakin indi o, turnirdəki çoxdan gözlənilən debütünə bir addım qədər yaxındır.
