On üç futbol federasiyası birgə bəyanatla UEFA prezidenti Aleksander Çeferini dünya çempionatının yeni genişləndirilmiş formatı barədə səsləndirdiyi fikirlərə görə tənqid edib.
Oxu.Az "RIA Novosti"yə istinadən xəbər verir ki, bəyanatda dünya çempionatında əhəmiyyətsiz matçların olmadığı vurğulanıb.
Qeyd edilib ki, Kabo-Verde, Kürasao və Özbəkistan üçün mundiala vəsiqə qazanmaq tarixi nailiyyət və nəsillərin arzusunun gerçəkləşməsidir. Konqo Demokratik Respublikası və Haiti üçün isə uzun fasilədən sonra futbolun ən böyük səhnəsinə qayıdış xüsusi əhəmiyyət daşıyır.
Bəyanatda bildirilib ki, bu oyunların daha az əhəmiyyətli olması ilə bağlı fikirlər böyük məyusluq yaradır və dünyanın hər yerində futbolçuların, məşqçilərin, klubların və azarkeşlərin göstərdiyi səyləri, fədakarlıqları və arzuları nəzərə almır.
Məktubu Kabo-Verde, Kürasao, Özbəkistan, Konqo Demokratik Respublikası, Haiti, Əlcəzair, Tunis, Mərakeş, Misir, Qana, Seneqal, Cənubi Afrika Respublikası və Kot-d'İvuarın federasiyaları imzalayıblar.
Aleksander Çeferin daha əvvəl komandalar arasındakı səviyyə fərqinin böyük olması səbəbindən dünya çempionatının genişləndirilmiş formatının maraqsız olduğunu bildirmişdi.
Qeyd edək ki, 2026-cı il dünya çempionatı ABŞ, Meksika və Kanadada keçirilir. Turnirdə ilk dəfə olaraq 48 komanda iştirak edir.
