Bu gün avrokuboklarda pley-off mərhələsinin püşkü atılacaq.
Oxu.Az xəbər verir ki, İsveçrənin Nyon şəhərində baş tutacaq UEFA Çempionlar Liqasının püşkatma mərasiminə Bakı vaxtı ilə saat 14:00-da start veriləcək. Bu tədbirdən tam iki saat sonra isə UEFA Konfrans Liqasında mübarizə aparan təmsilçimiz öz potensial rəqibi ilə tanış olacaq.
Həlledici püşk zamanı "Orhus" (Danimarka) - "Sabah" cütünün qalibinin də növbəti mərhələdəki rəqibinə aydınlıq gələcək. Səpələnməmişlər səbətində qərarlaşan bu cütlüyün rəqibi, səpələnmişlər səbətində yer alan aşağıdakı iddialı komandalardan biri olacaq:
- "Hapoel" (Beer-Şeva, İsrail) - "Srvena Zvezda" (Serbiya) cütünün qalibi
- "Dinamo Zaqreb" (Xorvatiya) - "Kauno Jalgiris" (Litva) cütünün qalibi
- "Seltik" (Şotlandiya)
- "Myölbü" (İsveç) - "Slovan Bratislava" (Slovakiya) cütünün qalibi
- AEK (Afina, Yunanıstan)
Həmçinin Saat 16:00-da start götürəcək Konfrans Liqasının püşkatma mərasimində isə "Dinamo Kiyev" (Ukrayna) - "Qarabağ" (Azərbaycan) duelinin qalibini gözləyən rəqib müəyyənləşəcək. Ağdam təmsilçisinin sahib olduğu yüksək reytinq xalları sayəsində bu cütlük püşkatmaya məhz səpələnmişlər səbətindən qatılacaq.
Qeyd edək ki, UEFA tərəfindən mümkün rəqiblərin sayı artıq minimuma endirilib. Təmsilçimizin səpələnməmişlər səbətindən qarşılaşa biləcəyi komandalar bunlardır:
- "Xetafe" (İspaniya)
- "Tvente" (Niderland) - DAC 1904 (Slovakiya) cütünün qalibi
- "Beytar" (İsrail) - "Austriya Vyana" (Avstriya) cütünün qalibi
- "Makkabi" (Tel-Əviv, İsrail) - "ÇSKA Sofiya" (Bolqarıstan) cütünün məğlubu
Məlumat üçün bildirək ki, Çempionlar Liqasında pley-off mərhələsinin ilk qarşılaşmaları avqustun 18-19-da, həlledici cavab görüşləri isə 25-26 avqust tarixlərində keçiriləcək. Konfrans Liqasında isə ilk oyunlar avqustun 20-də, cavab matçları isə avqustun 27-də təşkil olunacaq.
