UEFA Avropa Liqasının II təsnifat mərhələsində "ÇSKA Sofiya" ilə keçiriləcək cavab oyunu öncəsi "Qarabağ"ın baş məşqçisi Qurban Qurbanov matçla bağlı fikirlərini bölüşüb.
Oxu.Az xəbər verir ki, təcrübəli mütəxəssis hər iki komandanın mərhələ adlamaq üçün meydana çıxacağını vurğulayıb.
Qurbanov bildirib ki, onları Sofiyada çətin qarşılaşma gözləyir:
"Hər iki komanda üçün çox vacib oyundur. Rəqib kifayət qədər iddialı və motivasiyalıdır. Bu da bizi daha məsuliyyətli olmağa sövq edir. Hər iki komandanın şanslarını bərabər qiymətləndirirəm. İnanıram ki, azarkeşlər maraqlı və baxımlı oyuna şahid olacaqlar. Biz isə ən yaxşı oyunlarımızdan birini göstərmək istəyirik".
Baş məşqçi qeyd edib ki, növbəti mərhələyə yüksəlmək üçün komanda Bakıdakı ilk oyundan daha yaxşı çıxış etməlidir:
"Xüsusi dəyişikliklər edəcəyimizi deyə bilmərəm. Amma mərhələni keçmək istəyiriksə, mütləq ilk oyundakından daha yaxşı oynamalıyıq. Rəqib oyun ərzində rotasiyalar etməyi bacaran komandadır və buna hazır olmalıyıq".
Qeyd edək ki, komandalar arasında Bakıda keçirilən ilk görüşdə hesab açılmayıb. Cavab matçı iyulun 30-da Sofiyada baş tutacaq və Bakı vaxtı ilə saat 22:00-da başlayacaq.
