"Oyun bizim üçün olduqca yaxşı başladı".
Oxu.Az xəbər verir ki, bu sözləri UEFA Konfrans Liqasının I təsnifat mərhələsində keçirilən "Zirə" - "Torpedo Kutaisi" oyunundan sonra komandamızın baş məşqçisi Rəşad Sadıqov deyib. O, görüşün 65-ci dəqiqəsinə qədər hər şeyin "Zirə"nin planına uyğun getdiyini bildirib:
"Son 20-25 dəqiqədə komandamızda yorğunluq hiss olunurdu. Əvəzetmələrlə oyunun balansını qorumağa çalışdıq. Təbii ki, bu, ilk qarşılaşma idi. Bizi səfərdə 12 min azarkeşin qarşısında daha çətin oyun gözləyir. Rəqibin heyətində ustalıq səviyyəsi yüksək olan futbolçular var. Onlara meydanda rahat hərəkət etməyə imkan versəydik, bizə çox çətinlik törədəcəkdilər. Oyunu biz yaxşı keçirsək də, rəqib bizdən daha hazırlıqlı görünürdü".
* Dirk Şuster məğlubiyyəti şərh etdi: "Biz ən azı bir top buraxmağa hazırlaşmışdıq"
Baş məşqçi komandanın çatışmazlıqlarına da toxunub:
"Bizim əsas problemimiz bütün oyunçuların hazırlıq səviyyəsinin eyni dərəcədə yüksək olmamasıdır. Yeni transferlərimizin bəzilərində adaptasiya problemi var, buna görə də bir az gözləmək lazımdır. Ümid edirik ki, cavab oyununa qədər bütün problemləri həll edib sərfəli nəticə qazanacağıq".
Qeyd edək ki, UEFA Konfrans Liqasının I təsnifat mərhələsi çərçivəsində keçirilən "Zirə" - "Torpedo Kutaisi" qarşılaşması təmsilçimizin 3:0 hesablı qələbəsi ilə başa çatıb. Cavab matçı isə iyulun 16-da Kutaisidəki Ramaz Şengeliya stadionunda oynanılacaq. Görüş Bakı vaxtı ilə saat 20:00-da başlayacaq.
